«Հրապարակ» թերթը գրում է. «Մարդու իրավունքների եվրոպական դատարանի Հայաստանը ներկայացնող դատավորի պաշտոնի համար պայքարը շարունակվում է: Արդարադատության նախարարության իրականացրած երկրորդ մրցույթի արդյունքում հաղթող ճանաչված անձինք են՝ ՀՀ մարդու իրավունքների նախկին պաշտպան Արմեն Հարությունյանը, իրավաբան Արա Ղազարյանը և դատավոր Լիանա Հակոբյանը:
Ինչպես հիշում եք, 2014 թվականի հոկտեմբեր ամսին կայացած վիճահարույց մրցույթը ՀՀ նախագահի կողմից չեղյալ էր համարվել, քանի որ կայացել էր խախտումներով: Ընտրություններում հաղթող ճանաչված 3 թեկնածուները՝ նախկին օմբուդսմեն Արմեն Հարությունյանը, միջազգային իրավունքի մասնագետ Արա Ղազարյանն ու Գլխավոր դատախազության աշխատակից Նելիկ Հարությունյանը, պարզվել էր՝ չեն համապատասխանում ՄԻԵԴ չափանիշներին: ՄԻԵԴ-ը պահանջում է, որ թեկնածուները լինեն հանրության կողմից «ճանաչված և իրազեկ» իրավաբաններ: Նախկին ցանկի համեմատ նոր թեկնածուն դատավոր Լիանա Հակոբյանն է: Արդյոք նրա և Նելիկ Հարությունյանի միջև մե՞ծ է տարբերությունը, քանի որ նախորդ անգամ չնայած անուններ չնշվեցին, բայց ենթադրվեց, որ ոչ «իրազեկ ու չճանաչված» իրավաբանը հենց նա է:
«Չեմ կարծում, որ խնդիր առաջանա, Լիանան երկար տարիների փորձ ունի, փորձված մասնագետ է, երկար տարիներ աշխատել է Սահմանադրական դատարանում, դատավոր է և այլն, և այլն: Հանձնաժողովը եկել է այն կարծիքին, որ նա քաջատեղյակ է, իրազեկ է կոնվենցիայից»,- մեզ հետ զրույցում ասաց Արա Ղազարյանը:
Վերջինս էական տարբերություններ չի նկատել նախորդ և ներկայիս ընտրությունների միջև. «Բացառությամբ, իհարկե, առաջին փուլին, երբ ամեն օր արդարադատության նախարարությունը հրապարակում էր ցուցակը, քանի որ այդ առումով որոշ դժգոհություններ եղան, ցուցակը միայն ամբողջացնելուց հետո հրապարակվեց, և դա որոշակի դժգոհության տեղիք տվեց, որոշ շրջանակներ կասկած հայտնեցին, հիմա, զերծ մնալու համար, նրանք ամեն օր հրապարակում են ցուցակը»: Ընտրությունների հաջորդ փուլը կայանալու է Ստրասբուրգում: «Խորհրդատվական հանձնաժողովը պետք է իր կարծիքը տա, կարծիքներ փոխանակի ազգային մարմնի հետ, և վերջում՝ եթե դրական եղավ, կհրավիրեն Ստրասբուրգ: Եվ հուսով եմ, որ այս անգամ երկու որոշում չի կայացվի, որ ես կրկին անհարմար վիճակի մեջ չհայտնվեմ»,- եզրափակեց Արա Ղազարյանը:
Մանրամասները՝ թերթի այսօրվա համարում։