«Երկուշաբթի Forbes-ը հրապարակել է աշխարհի ամենահարուստ մարդկանց ամենամյա ցուցկը:
Թվով 29-րդ վարկանիշային աղյուսակում հայտնվել են 1826 միլիարդատերեր, որոնց կարողությունն ընդհանուր առմամբ կազմել է 7.05 տրիլիոն դոլար: Սակայն աչքի է ընկել այնտեղ մեկ մարդու` Ռուսաստանի նախագահ Վլադիմիր Պուտինի բացակայությունը, որի հարստության մասին շատերը վաղուց գուշակություններ են անում»,- գրում է Newsweek-ը:
Բանն այն է, որ Forbes-ն իր ցուցակից բացառում է արքայական ընտանիքի անդամներին և «բռնապետներին, ովքեր կարողությունը ձեռք են բերել բացառապես իշխանության գլուխ գտնվելու օրոք»:
«Վլադիմիր Պուտինը ցուցակում չկա, քանի որ մենք չենք կարողացել համոզվել այն բանում, որ նրան են պատկանում 1 մլրդ դոլարի կամ ավելի ակտիվները»,- ասել է Forbes-ի մամլո քարտուղար Քերի Դոլանը:
Նշվում է, որ 2012-ին Bureau of Investigative Journalism-ը նախագահի եկամուտները մանրամասն վերլուծության է ենթարկել և պարզել, որ պաշտոնական տվյալներով` նա և նրա կինը այդ պահին բանկում ունեցել են նվազագույնը կես միլիոն դոլար: Ըստ դրա` Պուտինի աշխատավարձը տարեկան կազմել է 140 հազար դոլար:
«Այնուամենայնիվ, երբ խոսքը վերաբերում է ունեցվածքին, Պուտինի կարգադրության ներքո են գտնվում պալատներ և զբոսանավեր, և նա բազմաթիվ նվերներ է ստացել, օրինակ` 200 հազար դոլար արժողությամբ ժամացույցներ: Ռուսական կառավարության պաշտոնական ներկայացուցիչը հրաժարվել է հստակեցնել Bureau of Investigative Journalism-ին` արդյոք այդ օբյեկտները նախագահի՞, թե՞ պետության սեփականությունն են»,-ընդգծում է պարբերականը: