iPhone սմարթֆոնները 2014 թ. չորրորդ եռամսյակում շուկայում ամենապահանջվածն են եղել, ինչը հնարավորություն է տվել Apple-ին վաճառված սարքավորումների ցուցանիշով առաջ անցնել Samsung-ից: Այս մասին է հաղորդում TechCrunch-ը՝ հղում անելով Gartner-ի կատարած ուսումնասիրությանը:
Ամերիկյան ընկերությունը չորրորդ եռամսյակում 75 միլիոն սմարթֆոն է վաճառել, իսկ կորեական հսկան՝ 73 միլիոն: Մեկ տարի առաջ Samsung-ի ցուցանիշները 83 միլիոն էին կազմում, իսկ Apple-ինը՝ 50 միլիոն:
Վաճառված սմարթֆոնների ցուցանիշով երրորդ ընկերությունը Lenovo-ն է, որը 24 միլիոն սարքավորում է իրացրել: Այս ցուցանիշը ներառում է նաև Motorola-ի վաճառքը, որը չինական ընկերությունը նախկինում էր ձեռք բերել: Lenovo-ին 21 միլիոն ցուցանիշով հետևում է Huawei-ը, իսկ հնգյակը եզրափակում է Xiaomi-ն, որը 18 միլիոն սմարթֆոն է իրացրել: Սմարթֆոնների շուկա չորրորդ եռամսյակում 368 միլիոն սարքավորում է ներմուծվել: