Ինչպես հաղորդում է չինական Xinhua գործակալությունը, հայ-չինական բարձր մակարդակի բիզնես-ֆորում է կազմակերպվելու Երևանում այս տարվա ապրիլի 12-ին այն բանից հետո, երբ հինգշաբթի օրը Հայաստանը վավերացրեց Չինաստանի հետ տեխնիկական և տնտեսական համագործակցության համաձայնագիրը: Այդ ֆորումի ընթացքում կստորագրվի նաև տեխնիկական և տնտեսական համագործակցության պայմանագիր:
Գործակալությունը հաղորդում է, որ Հայաստանի և Չինաստանի միջև երկկողմ առևտուրը 2010 թ.-ին աճել է 44.4%-ով` հասնելով 436.7 մլն դոլարի: Արտահանումը Չինաստան աճել է 73.6%-ով` հասնելով 30.9 մլն դոլարի: Այսպիսով, Չինաստանը դարձել է Հայաստանի երկրորդ գործընկերը արտաքին առևտրի ցուցանիշներով` հետ մնալով միայն Գերմանիայից: Չինաստանը մեծ հետաքրքրություն է արտահայտել հայկական գինիների և կոնյակի նկատմամբ:
Հինգշաբթի օրը Հայաստանում տեղի է ունեցել Հայաստան-Չինաստան միջկառավարական հանձնաժողովի նիստ, որտեղ որոշում է կայացվել Հայաստանին 3.2 մլն դոլարի դրամաշնորհ տրամադրելու վերաբերյալ: Բացի այդ, կողմերը համաձայնել են ենթակառուցվածքների զարգացման, էներգետիկ, զբոսաշրջության և հանքարդյունաբերության ոլորտում համագործակցություն իրականացնելու վերաբերյալ: