Իրաքի բանակը՝ դիմադրության զինված միավորումների աջակցությամբ կոտրել է ԴԱԻՇ-ի («Իրաքի և Շամի իսլամական պետություն») պաշտպանությունը Տիկրիտ քաղաքում և սկսել է փողոցներն ահաբեկիչներից մաքրել: Այս մասին հայտնում է «Ալ-Արաբիա» հեռուստաընկերությունը:
Իրաքի կենտրոնական իշխանությունների զինված ուժերը երկուշաբթի օրը Տիկրիտ քաղաքը ԴԱԻՇ-ից ազատագրելու լայնամասշտաբ գործողություն են սկսել: Ալիքի տեղեկությամբ՝ լայնածավալ հարձակման արդյունքում, որին մասնակցում է մոտ 30.000 զինվորական, ԴԱԻՇ-ի գրոհայինները սկսել են նահանջել դեպի հյուսիս-արևելք:
Ռազմական գործողության հրամանատարը երեքշաբթի օրը հայտարարել է Դիյալա և Սալահ ադ-Դին մարզերի սահմանին անվտանգության ապահովման գործողության առաջին փուլի հաջող ելքի մասին:
Sky News Arabia հեռուստաալիքի տեղեկացմամբ՝ ռազմական գործողության սկզբից ի վեր Իրաքի ռազմաօդային ուժերի օդային հարվածների արդյունքում ավելի քան 60 գրոհային է ոչնչացվել:
Տիկրիտում իրաքյան բանակի հաջողության դեպքում բանակը հնարավորություն կունենա ուղղվել դեպի Նայնավա նահանգ և Մոսուլ քաղաք, որը ԴԱԻՇ-ի գրոհայինները հայտարարել են այսպես կոչված՝ Խալիֆայության մայրաքաղաք: