«Դոժդ» հեռուստաալիքի պաշտոնական կայքը Բորիս Նեմցովի սպանությունը լուսաբանելիս ենթարկվել է երկարատև կոմբինացված DDoS հարձակումների, որը շարունակվել է 2 օր: Այս մասին իր մամլո հաղորդագրության մեջ հայտնել է Qrator Labs ընկերությունը, որը ծառայություններ է մատուցում DDoS հարձակումներին հակազդելու ուղղությամբ:
«Հերթական DDoS-հարձակումը՝ NTP-amplification տեխնոլոգիայի կիրառմամբ, սկսվել է շաբաթ՝ փետրվարի 28-ին, ժ. 19.30-ին, ու ավարտվել մարտի 2-ի առավոտյան: IP-հասցեների վերլուծությունը ցույց է տվել, որ հարձակումն իրականացվել է Թայվանից, Չինաստանից, Բրազիլիայից ու Ռուսաստանից»,- ասվում է հաղորդագրությունում:
Ինչպես հայտարարել են ընկերության ներկայացուցիչները, երկրորդ հարձակումը չի ունեցել անհրաժեշտ էֆեկտ ու ընդհատվել է 25 րոպե անց:
«Դոժդի» աշխատակիցները այդ հարձակումները կապում են Բորիս Նեմցովի սպանության լուսաբանման հետ. սպանությունը տեղի է ունեցել Մոսկվայի կենտրոնում՝ ուրբաթ գիշերը:
Ցանցահենները առաջին անգամ իրենց հետաքրքրությունը «Դոժդի» նկատմամբ ցուցադրել են 2011թ. դեկտեմբերին, երբ հեռուստաալիքը լուսաբանում էր Ռուսաստանի Պետդումայի ընտրությունները և Բոլոտնայա հրապարակում, Սախարովի անվան պողոտայում դրան հետևած միտինգները ու մյուս ընդդիմադիր ակցիաները՝ նվիրված արդար ընտրություններին: