ԲՀԿ մամուլի խոսնակ Տիգրան Ուրիխանյանը, պատասխանելով «Առաջին լրատվական»-ի հարցին, թե ինչպես է վերաբերվում ԲՀԿ խմբակցության անդամ Աբրահամ Մանուկյանի՝ կուսակցությունը լքելու մասին տարածվող լուրերին և նրա այն հայտարարությանը, թե ինքը որևէ մեկի հետ հակասություններ չունի, իսկ Նաիրա Զոհրաբյանը կնիկ է, որոնց հետ ինքը ընդհանրապես խնդիրներ չի ունենում, Ուրիխանյանը պատասխանեց. «ԲՀԿ քաղաքական խորհրդում և պատգամավորական խմբակցությունում հարցերը քննարկվում, և որոշումները կայացվում են փոխադարձ վստահության, օրինականության, կարծիքների համադրման, իրար ուս ուսի տալու և օժանդակելու ձևաչափի շրջանակներում: Անձամբ ես իմ կին գործընկերներին անվանում եմ կանայք և ոչ թե կնիկ և միշտ հաշվի եմ նստում նրանց կարծիքի և տեսակետի հետ: ԲՀԿ-ում չի կարող լինել անառողջ մթնոլորտ, իսկ կարծիքների, տեսակետների տարաձայնությունները պետք է լուծել իրար լսելու և իրար հասկանալու մթնոլորտում»:
Ինչպես հայտնի է՝ Աբրահամ Մանուկյանը համարվում էր ԲՀԿ նախագահի հավանական թեկնածու և փորձում էր իր շուրջը համախմբել ԲՀԿ գործարար թևին՝ այդ նպատակին հասնելու համար: Ինչ-որ պահի տեղեկություններ տարածվեցին, որ Մանուկյանը համաձայնել է, որ կուսակցության նախագահ դառնա Նաիրա Զոհրաբյանը, և իրեն վերապահվի կուսակցության, ըստ էության, երկրորդ դեմքի լիազորությունները, երբ նա կզբաղվի կուսակցության ֆինանսավորմամբ և տարածքային կառույցների համակարգմամբ: Սակայն Մանուկյանը համարել է, որ եթե կուսակցության ծախսերը ինքը պետք է հոգա, կամ գոնե առյուծի բաժինը, ապա ինչո՞ւ պետք է դրա ղեկավարումը հանձնի Զոհրաբյանին, թեկուզ ֆորմալ առումով լինի «կնկա տեղակալ»:
Դրանով կարող է պայմանավորված լինել Մանուկյանի հայտարարությունը, չնայած նա փորձելու է համագումարում անցկացնել իր տեսակետը և միայն այնտեղ պարտվելու դեպքում դուրս գալ ԲՀԿ-ից:
Տիգրան Ուրիխանյանը ըստ էության չցանկացավ պատասխանել մեր հարցին, թե արդյոք Մանուկյանի հայտարարությունը կապ ունի՞ կուսակցության նախագահի պաշտոնի համար մղվող պայքարի հետ: «Ես այս հարցի շուրջ որևէ դիտարկում չունեմ և կարծում եմ, որ պետք չէ իրադարձություններից առաջ ընկնել»,- հայտարարեց նա:
ԲՀԿ-ի համար ավելի կարևոր է ոչ թե այն, թե ով կլինի կուսակցության նախագահը, այլ այն, թե ինչ քաղաքական գիծ կորդեգրի այն, ինչ ուղղությամբ կշարժվի՝ դեպի ՀՀԿ կգնա, թե՞ կկարողանա պահպանել իր անկախությունը:
Այդ իմաստով կարևոր նշանակություն ունի այսօր խորհրդարանում երկրորդ ընթերցմամբ քննարկվող «Շահութահարկի մասին» օրենքը: Արդյոք ԲՀԿ-ն կո՞ղմ կքվեարկի այս նախագծին, ինչպես ՀՀԿ-ն, թե՞ դեմ, ինչպես ընդդիմադիր խմբակցությունները: Առաջին ընթերցման ժամանակ խորհրդարանական չորս ընդդիմադիր խմբակցությունները դեմ էին քվեարկել «Շահութահարկի մասին» օրենքում փոփոխություններ կատարելու կառավարության առաջարկին: Մեր այս հարցին ի պատասխան՝ Ուրիխանյանը հայտարարեց. «ԲՀԿ-ն մեծ ջանքեր է գործադրել օրենսդրական փաթեթի ձևավորման ուղղությամբ: Կարող եմ ասել, որ մեր բոլոր առաջարկություններն ու նկատառումները ընդունվել են, տեսնենք, թե ինչ կստացվի»:
Իսկ ստացվեց այն, որ ԲՀԿ խմբակցության քարտուղար Նաիրա Զոհրաբյանը այսօր հայտարարեց, որ ԲՀԿ-ն քվեարկում է ձեռնպահ, այսինքն՝ ԲՀԿ-ն վերադառնում է գրեթե մեկ տարի առաջ ունեցած իր քաղաքական գծին՝ ո՛չ ընդդիմություն, ո՛չ իշխանություն, այլ անհասկանալի այլընտրանք: