Ամերիկյան Forbes ամսագիրը հրապարակել է աշխարհի ամենահարուստ մարդկանց վարկանիշային աղյուսակը, որում տեղ է գտել 5 հայ գործարար:
Աշխարհի ամենահարուստ հայը Քըրք Քըրքորյանն է: Վերջինիս կարողությունը Forbes-ը գնահատել է 4.2 մլրդ դոլար և տեղավորել 393-րդ հորիզոնականում: Վարկանիշային աղյուսակում տեղ են գտել նաև ռուսաստանցի գործարար «Տաշիր» ընկերությունների խմբի ղեկավար Սամվել Կարապետյանը (418-րդ հորիզոնական, 4 մլրդ դոլար), Դանիլ Խաչատուրովը (1190-րդ հորիզիանական, 1.6 մլրդ դոլար), Սերգեյ Գալիցկին (162-րդ հորիզոնական, 8.3 մլրդ դոլար) և արգենտինահայ գործարար Էդուարդո Էռնեկյանը (1006-րդ հորիզոնական, 1.9 մլրդ դոլար):
Վարկանիշային աղյուսակի առաջին հորիզոնականը հերթական անգամ զբաղեցնում է Microsoft-ի համահիմնադիր Բիլ Գեյթսը: Նրա կարողությունը Forbes-ը գնահատել է 79.2 միլիարդ դոլար:
Երկրորդ տեղում, ինչպես 2014թ., հեռահաղորդակցության մեքսիկացի մագնատ Կառլոս Սլիմն է: Նրա կարողությունը 77,1 միլիարդ դոլար է գնահատվել: Երրորդ տեղում հայտնվել է ներդրող Ուորեն Բաֆեթե՝ 72,7 միլիարդ դոլար կարողությամբ:
Inditex ( Zara, Massimo Dutti և այլ բրենդներ) ընկերության հիմնական սեփականատեր Ամանսիո Օրտեգան երրորդ տեղից չորրորդ տեղն է տեղափոխվել: Իսպանացու կարողությունը Forbes-ը 64,5 միլիարդ դոլար է գնահատել:
Oracle-ի հիմնադիր Լարի Էլիսոնը եզրափակում է աշխարհի հինգ ամենահարուստ մարդկանց հնգյակը, նրա կարողությունը 54,3 միլիարդ դոլար է:
Ամերիկյան Forbes-ի` 2015թ. ցուցակում ներառվել է 1826 մարդ: Նրանց ընդհանուր կարողությունը 7,05 տրիլիոն դոլար է կազմում, որը, անցած տարվա հետ համեմատած, 600 միլիարդ դոլարով ավելի է: 2015թ. վարկանիշի մասնակիցների միջին կարողությունը 3,86 միլիարդ դոլար է կազմում, որը, անցած տարվա հետ համեմատած, 60 միլիոն դոլարով պակաս է:
Վարկանիշային աղյուսակում կա 197 կին: Կանանց շրջանում առաջատարը Wal-Mart-ի համասեփականատեր Քրիստի Ուոլթոնն է: Նա ընդհանուր ցուցակում ութերորդ տեղն է զբաղեցնում` 41,7 միլիարդ դոլար ցուցանիշով: Նրան հետևում են L’Oreal-ի տիրուհի Լիլիան Բետանկուրը (№10, 40,1 միլիարդ դոլար) և Քրիստի Ուոլթոնի ամուսնու քույրը՝ Էլիս Ուոլթոնը (№11, 39,4 միլիարդ դոլար):
Վարկանիշային աղյուսակի ամենաերիտասարդ մասնակիցը Snapchat մեսենջերի 24-ամյա համահիմնադիր Էվան Շպիգելն է (№1250, 1,5 միլիարդ դոլար): Ցուցակում ամենատարեցը 99-ամյա Դևիդ Ռոքֆելլեր-ավագն է, ով 3 միլիարդ դոլար ցուցանիշով 603-րդ տեղում է:
Forbes-ի 2015թ. վարկանիշային աղյուսակում ռեկորդային թվով սկսնակներ կան՝ 290 (նրանցից 71-ը Չինաստանն են ներկայացնում): Սկսնակների թվում են Theranos-ի հիմնադիր և գլխավոր տնօրեն Էլիզաբեթ Հոլմսը (№365, 4,5 միլիարդ դոլար), Airbnb-ի համահիմնադիր Բրայան Չեսկին (№1006, 1,9 միլիարդ դոլար), Snapchat-ի հիմնադիրներ Էվան Շպիգելը և Բոբի Մերֆը (միասին №1250, 1,5 միլիարդ դոլար), բասկետբոլիստ Մայքլ Ջորդանը (№1741, 1 միլիարդ դոլար)