Թեպետ հարևան Վրաստանում լարիի կուրսը վերջին երկու օրերին որոշակիորեն կայունացել է՝ վրացի տնտեսագետները դժվարանում են կանխատեսել, թե առաջիկայում ինչ պատկեր կլինի:
«Առաջին լրատվական»-ի հետ զրույցում տնտեսագետ Վիլեն Խաչատրյանը կարծիք հայտնեց, որ Վրաստանում արժույթի շուկայում այս օրերին տեղի ունեցողն անկասկած իր ազդեցությունը կթողնի տարածաշրջանային երկրների, այդ թվում՝ Հայաստանի վրա:
Նրա խոսքերով՝ եթե զբոսաշրջության ոլորտում Հայաստանը կարող է շահել, ապա Վրաստանում բիզնեսներ ունեցող շատ հայ գործարարներ էականորեն կտուժեն. «Մենք բավականին մեծ տուրիստական հոսք ունենք դեպի Վրաստան, այդ տեսանկյունից դրական ազդեցություն կունենա լարիի անկումը: Մեզ մոտից, բնականաբար, դոլար են տանում ու լարի ձեռք բերում, եթե գների թանկացում տեղի չունենա այնքանով, ինչքանով իրենց արժույթն է արժեզրկվում, դա ավելի նպաստավոր կլինի Հայաստանի համար՝ զուտ տուրիզմի առումով:
Իսկ ինչ վերաբերում է թանկացումներին՝ վատ ապրելուն, այդ առումով տնտեսական վիճակի վատացումը բացասաբար կազդի: Հաշվի առեք նաև այն հանգամանքը, որ հայերն այնտեղ բիզնես ունեն, ու նրանց բիզնեսի վրա էլ է ազդելու: Բացի այդ՝ Վրաստանում հարկային համակարգը բավականին արդյունավետ է աշխատում, տարածաշրջանում առաջին երկիրն է, և այդ առումով կոնկրետ հետընթաց կարող է լինել, իսկ տնտեսական գործունեության առումով իրավիճակը ոչ նպաստավոր կարող է դառնալ»,- նկատեց մեր զրուցակիցը:
Միևնույն ժամանակ Վիլեն Խաչատրյանն ընդգծեց, որ գլոբալ առումով չի կարող այնպես լինել, որ Վրաստանում իրավիճակը վատթարանա, իսկ Հայաստանում ամեն ինչ նորմալ լինի. «Եթե հարևանիդ գործերը լավ չեն, ապա քո գործերը դրանից չեն կարող լավանալ: Իրար փոխկապակցված տնտեսություններ ունենք՝ մեր տնտեսության վրա բոլոր դեպքերում լինելու է բացասական ազդեցություն: Առայժմ Վրաստանի տնտեսությունից տոկոսային կախվածության վերլուծություն չեմ արել»,- ընդգծեց նա:
Մեր այն դիտարկմանը, թե կախվածությունն, այնուամենայնիվ, չի՞ նվազել Հայաստանի՝ Եվրասիական տնտեսական միությանն անդամակցելուց և Վրաստանի՝ Եվրամիության հետ Ասոցացման համաձայնագիրը ստորագրելուց հետո, Վիլեն Խաչատրյանը պատասխանեց. «Կապը եթե այդ տեսանկյունից եք դիտարկում, ապա միևնույն է՝ մեզ Եվրասիական տնտեսական միությանը միացնող երկիրը Վրաստանն է, այս դեպքում՝ տրանզիտային երկիր է: Վրաստանի հետ պայմանագրային հարաբերություններն այս առումով հստակեցված են: Ինչ վերաբերում է հակառակ ուղղություններին, ապա բոլոր դեպքերում՝ Վրաստանն այն երկիրն է, որի միջոցով Հայաստանը և՛ դեպի Եվրասիական տնտեսական միություն, և դեպի՛ Եվրամիության Ասոցացման համաձայնագիր գործառույթներ է իրականացնում: Այսինքն՝ բացի դեպի ԵՏՄ տրանզիտային երկիր լինելուց, Վրաստանը նաև մեր՝ Ասոցացման համաձայնագիր ստորագրած հարևան երկիրն է: Այս տեսանկյունից որոշակի խաղի կանոններ կարող են փոխվել, բայց թե ինչպես կփոխվեն՝ դեռ հարց է. կօգտագործե՞ն դա մեզ ճնշելու համար, թե՞ հակառակը՝ առայժմ պարզ չէ»: