«Առևտրականների ջարդը շարունակում են, շուկայի տեղը չիմացողները հիմա էլ մեզանից 5 տոկոս են ուզում»,- «Առաջին լրատվական»-ի հետ զրույցում նշեցին Նորքի շուկայի աշխատակիցները:
Առևտրականներից Անդրանիկ Հունանյանն ընդգծեց, որ այսօր խորհրդարանը քննարկելու է «Շրջանառության հարկի մասին» օրենքում փոփոխությունները, ըստ որոնց` առևտրականները կա’մ պետք փաստաթղթավորեն ապրանքները և վճարեն 1,5 տոկոս, կա’մ վճարեն 5 տոկոս: Ըստ նրա՝ 5 տոկոսը գնողունակության անկման պարագայում շատ բարձր է, առանց այդ էլ ի վիճակի չեն անգամ 1,5 տոկոսը վճարել: «Վերջին ամիսներին երևաց` առևտուր չի լինում: Իրականում 5 տոկոսը շատ բարձր հարկատեսակ է, ապրանքաշրջանառությունը շատ քիչ է, անցումային շրջան է մեզ պետք, թող մինչև տարեվերջ գոնե մնա 3,5 տոկոս, առանց այն էլ փակվում է բիզնեսը, հետո հասնեն 1 տոկոսի»,- ասաց նա:
Շուկայում նաև բարկացած նշում էին, որ ժողովրդի մասին չեն մտածում. «Թող էս օբյեկտների ու ռեստորանների փոխարեն գործարան բացեն, աշխատենք, շուկայում կանգնելը մեզ էլ հաճելի չէ, բայց մի կտոր հացի փող ենք վաստակում: Շուկայից կուրսի չեն, օրենքներ են հանում: Եթե ուզում են մի կտոր հացը մեր ձեռքից վերցեն, թող վերցնեն, անհարմար է»:
Առևտրականները նշեցին, որ թեև կառավարությունը խոստացել էր, որ լավ է լինելու, բայց հիմա հակառակ միտումն է: Ըստ նրանց` եթե գնորդ չկա, հարկ էլ չկա, ուր մնաց` բարձր հարկ: «Փաստաթղթավորումը աբսուրդ է, 5 տոկոսը` ևս: Իրենք էլ գիտեն, փաստաթուղթն իրենք են տալիս, թող տան: Անհնար է, թող քարը փեշներից թափեն, թողնեն` հանգիստ աշխատենք: Քմահաճույք չէ, անհնարինը չենք կարող անել, թող 3,5 թողնեն, առանց փաստաթղթավորման»,- եզրափակեցին առևտրականները:
Առևտրականները բարկացած նշում էին, որ հոգնել են պահանջելուց, իրենց լսող չկա, բացի այդ` կարող է` իրենք էլ ծեծ ուտեն, առանց այն էլ սոցիալական ջարդ են անում:
Մանրամասները՝ տեսանյութում