Այսօր Մոսկվայում վերջին հրաժեշտը կտան անցյալ շաբաթավերջին Մոսկվայում, Կրեմլի հարևանությամբ զբոսնելիս գնդակահարված Պուտինի իշխանության հայտնի քննադատ, այսպես ասած` ոչ համակարգային արտախորհրդարանական ընդդիմության առաջնորդներից մեկը՝ Բորիս Նեմցովին: Սպանությունն իրավամբ ցնցել է ողջ աշխարհը:
Աշխարհը ուղղակի կամ անուղղակի մեղադրում է ՌԴ իշխանություններին, ՌԴ իշխանությունները հայտարարում են, որ սպանությունն իրենց դեմ էր: Այսպես, թե այնպես, տեղի ունեցածը չափազանց մտահոգիչ է, այդ թվում և` Հայաստանի համար, նկատի ունենալով մի քանի էական հանգամանքներ:
Նախ Ռուսաստանն ահռելի ազդեցություն ունի Հայաստանի վրա, և այն, ինչ տեղի է ունենում այդ երկրում, այսպես, թե այնպես ազդեցություն է թողնում Հայաստանի վրա: Սա նշանակում է, որ Նեմցովի սպանությունը միանշանակ դատապարտելի լինելով առաջին հերթին մարդկային բարոյականության և իրավականության տեսանկյունից, լինելով առաջին հերթին մարդկային ողբերգություն` նաև պետք է հանդիսանա լրջագույն դիտարկման նյութ հասկանալու համար, թե Ռուսաստանում առկա ինչ իրավիճակի և հնարավոր ինչ զարգացումների հետ գործ ունենք մենք, ինչ ուղղությամբ է գնում մեր երկրի վրա ահռելի ազդեցություն ունեցող այդ պետությունն ու ինչ վտանգներ ու ռիսկեր կան մեզ համար:
Մյուս մտահոգիչ հանգամանքն այն է, որ սպանությունն, ըստ էության, հանդիսանում է անհանդուրժողականության մթնոլորտի արգասիք: Ռուսաստանում պաշտոնական քարոզչությունը բավական ագրեսիվ կերպով անհանդուրժողականություն է տարածում Պուտինի քաղաքականության ցանկացած ընդդիմախոսության հանդեպ: Եվ նման տոտալ անհանդուրժողականության մթնոլորտում բռնությունը թևածում է օդում և կարող է բառի բուն իմաստով միս ու արյուն ստանալ ցանկացած պահի:
Ահա այս տեսանկյունից այլ կարծիքի հանդեպ անհանդուրժողականությունը հրատապ խնդիր է նաև Հայաստանում: Այստեղ, իհարկե, դեռ ռուսական դոզային չենք հասել, սակայն կա մեկ այլ վտանգավոր բան՝ այստեղ անհանդուրժողականությունը քարոզվում էր և՛ իշխանական, և՛ այսպես ասած` ոչ իշխանական մակարդակներում: Այլ կերպ ասած` երկկողմանիորեն էր սրվում անհանդուրժողականությունը, և մենք լրջորեն մտածելու բան ունենք` իրավիճակի այնպիսի կրիտիկական զարգացում թույլ չտալու համար, երբ ողբերգությունները կլինեն անխուսափելի: Առավել ևս, որ բարեբախտաբար, իհարկե, ոչ սպանության, սակայն բռնությունների դեպքեր վերջին շրջանում եղել են շատ հաճախ: