Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ քննվում է Իվետա Ա.-ի գործը:
Ըստ մեղադրանքի՝ Երևան քաղաքի բնակչուհի Իվետան իր 33 տարին լրանալուց մի քանի օր հետո՝ 2014 թվականի նոյեմբերի 20-ին գնացել է Սյունիքի մարզ՝ նախկին ամուսնու ընտանիքում ապրող երեխաներին տեսակցելու համար:
Սակայն մայրական կարոտն առնելու փոխարեն Իվետան, ըստ մեղադրանքի, ծեծել է նախկին սկեսուրին՝ ոտքով երկու անգամ հարվածել է նրա ազդրին ու թեթև վնասի հատկանիշներ չպարունակող վնասվածքներ է պատճառել:
Միայն նախկին սկեսուրին հարվածելով Իվետան չի սահմանափակվել:
Առաջադրված մեղադրանքի համաձայն՝ նա ծեծել է նաև որդուն, ում տեսակցելու համար հասել էր նախկին սկեսուրի տուն:
Անչափահաս որդուն Իվետան մեկ անգամ ապտակել է, երկու անգամ էլ ոտքով հարվածել է տղայի ձախ սրունքին:
«Մարտական հնարքներ» կիրառող մայրիկին՝ Իվետա Ա.-ին, երկու դրվագով մեղադրանք է առաջադրվել ՀՀ քրեական օրենսգրքի 118 հոդվածով:
Ամբաստանյալի խափանման միջոցը ստորագրությունն է չհեռանալու մասին: