Անցած տարի առնվազն 60 կին Մեծ Բրիտանիայից մեկնել է Սիրիա՝ միանալու ԴԱԻՇ («Իրաքի և Շամի իսլամական պետություն») ծայրահեղական խմբավորմանը: TASS-ի հաղորդմամբ՝ այս մասին կիրակի օրը հայտարարել է բրիտանական ոստիկանության հակաահաբեկչական պայքարի հարցերով ազգային կոորդինատոր, լոնդոնյան Սքոթլենդ-յարդի ղեկավարի օգնականի տեղակալ Հելեն Բոլլը:
«Այդ խնդրի մասշտաբներն աճում են, և դա անհանգստություն է առաջացնում,- ասել է նա:- Որքան ավելի զգոն լինեն զբոսաշրջությունների և ավիափոխադրումների ոլորտում աշխատող մարդիկ, այնքան լավ»: «Ոստիկանությունը նոր լիազորություններ ունի արտասահմանյան անձնագրերը վերցնելու մարդկանցից, որոնք, ինչպես մենք կասկածում ենք, կարող են մեկնել ահաբեկչական գործունեությամբ զբաղվելու համար: Մենք արդեն սկսել ենք օգտվելայդ իրավունքից»,- հավելել է Բոլլը:
Բրիտանական մամուլի հաղորդմամբ՝ պրոպագանդայի ազդեցությամբ, որը ծայրահեղականները վարում են սոցցանցերում, որոշ երիտասարդ մուսուլման կանայք Մեծ Բրիտանիայից և այլ երկրներից Թուրքիայով մեկնում են Սիրիա՝ ԴԱԻՇ-ի վերահսկողության տակ գտնվող տարածք: Այդ կանանց մեծ մասը Սիրիա է մեկնում գրոհայինների հետ ամուսնանալու նպատակով:
