Իսրայելի վարչապետ Բենիամին Նեթանյահուն մեկնել է ԱՄՆ՝ իր այցն անվանելով «պատմական առաքելություն», որի նպատակն է խանգարել Իրանի հետ միջուկային գործարքին և, ինչպես հավելում են մրցակիցները, հընթացս մեծացնելու վերընտրվելու սեփական հնարավորությունները: Այս մասին հայտնում է Ria Novosti-ն:
Կաբինետի ղեկավարը մտադիր է մարտի 3-ին ամերիկյան Կոնգրեսում խոսել իրանական ատոմի սպառնալիքի, պատրաստվող պայմանավորվածությունների վնասակարության և Թեհրանի հետ երկխոսության հարցում ԱՄՆ նախագահ Բարաք Օբամայի կուրսի սխալ լինելու մասին: Հանրապետականների՝ Սպիտակ տան տիրոջ քաղաքական մրցակիցների նախաձեռնած ելույթը տեղի կունենա Իսրայելում խորհրդարանական ընտրություններից 2 շաբաթ առաջ, որոնց արդյունքներով երկրում նոր կառավարություն կձևավորվի:
«Ես Վաշինգտոն եմ մեկնում ճակատագրական և նույնիսկ պատմական առաքելությամբ: Ես ինձ զգում եմ ամբողջ հրեա ժողովրդի, բոլոր իսրայելցի քաղաքացիների պատվիրակ, այդ թվում նրանց, ովքեր ինձ հետ համաձայն չեն»,- ինքնաթիռի սանդուղքի մոտ ասել է Նեթանյահուն:
Ընդգծելով այցի ճակատագրական բնույթը՝ նա նախօրեին գնացել է Երուսաղեմի Լացի պատի մոտ: Այնտեղ Նեթանյահուն ասել է, որ Իսրայելի գոյությունը նորից վտանգված է: «Մենք վճռականորեն դեմ ենք համաձայնագրին, որը հիմա ձևակերպվում է Իրանի և «մեծ տերությունների» միջև: Այն կարող է վտանգել մեր գոյությունը»,- ասել է Նեթանյահուն:
Նա բազմիցս ասել է, որ պատրաստվող համաձայնագիրը վատ է, որովհետև Իրանին հնարավորություն է տալիս հաստատվել շեմային միջուկային տերության դիրքում՝ ունակ քաղաքական որոշման առկայության դեպքում սեղմ ժամկետներում ստոմային զենք ստանալու:
Նեթանյահուի մեկնումը դժգոհություն է առաջացրել Սպիտակ տանը, որտեղ հրաժարվել են ընդունել Նեթանյահուին, և հայրենիքում վարչապետի քննադատության պատճառ է դարձել: Ընդդիմությունը նրան մեղադրում է հանուն խորհրդարանական ընտրություններում լրացուցիչ միավորների՝ կենտրոնական ռազմավարական դաշնակցի հետ հարաբերությունները հարվածի տակ դնելու պատրաստակամության համար:
