«Այս 7 տարի է՝ հասկացել ենք, որ Մարտի 1-ը բացահայտելու գործընթացները ունեն իմիտացիոն բնույթ, հիմա էլ գործերը առանձին են քննում. սա շոու է»,- «Առաջին լրատվական»-ի հետ զրույցում ասաց 2008թ. Մարտի 1-ի զոհ Գոռ Քլոյանի հայրը՝ Սարգիս Քլոյանը:
Ըստ նրա՝ իշխանությունները երբեք չեն կոտրի այն ճյուղը, որի վրա իրենք նստած են: Սարգիս Քլոյանի համոզմամբ՝ հիմա 10 զոհերի գործը առանձին վարույթով քննելը ոչինչ չի տալու, փոխվում են քննիչները, բայց մոտեցումները՝ ոչ։ «Երբ ինձ կանչել էին հարցաքննության՝ քննիչը երբ վերջացրեց արձանագրությունը, կարդացի տեսա, որ վերևի մասում գրված է՝ «զենքի ոչ ճիշտ օգտագործման հետևանքով ունեցել ենք զոհեր»: Ես քննիչին հարցրի՝ եթե դուք չգիտեք՝ ովքեր են մեր երեխաներին սպանողները, ապա ինչպե՞ս գիտեք, որ զենքը ոչ ճիշտ կամ անզգույշ են օգտագործել, քննիչը իմ հարցին չպատասխանեց»,-պատմեց նա:
Նոր քննիչը նաև անպատասխան է թողել իրավահաջորդի հաջորդ հարցը, որը վերաբերել է «Չերյոմուխա 7»-ին. «Ես հարցրի՝ եթե դա խստիվ արգելված զենք էր, ապա ո՞վ էր արգելված զենքը զորամասից դուրս հանելու հրաման տվել. այս հարցին էլ չպատասխանեց»։
Մեր զրուցակիցը հավելեց, որ Մարտի 1-ը կբացահայտվի միայն ամբողջական իշխանափոխության դեպքում, քանի որ հանցագործությունը արդեն իսկ բացահայտված է, բայց անուններ չեն ասում. «Քանի որ կրակողը կասի՝ ինձ հրամանատարն ա ասել, հրամանատարն էլ կասի՝ նախարարը, նախարարն էլ կասի՝ գերագույն գլխավոր հրամանատարը»,- մանրամասնեց Սարգիս Քլոյանը:
Նա հիշելով 2008թ-ի Մարտի 1-ի դեպքերը՝ ասաց, որ եթե սադրիչներին հաջողվեր ցուցարարներին տանել Բաղրամյան 26, մսաղաց կլիներ, ժողովրդին կջարդեին:
Մանրամասները՝ տեսանյութում։
