2008 թվականից ի վեր ամեն տարի Ազատություն հրապարակում Հայ ազգային կոնգրեսը հանրահավաք է անցկացնում, ապա Մյասնիկյանի արձանի մոտ հարգում Մարտի 1-ի ոճրագործության զոհերի հիշատակը: Նախորդ տարիներին Կոնգրեսին միացել են ընդդիմադիր այլ կուսակցություններ, անցած տարի հրապարակում էին նաև այդպես էլ ընդդիմություն չդարձած «Բարգավաճ Հայաստանի» որոշ պատգամավորներ:
Այս տարի ՀԱԿ-ը ցույցը միայնակ է անկացնելու, «Ժառանգությունը» հայտարարել է, որ լինելու է Տավուշի մարզում, իսկ «Բարգավաճ Հայաստանից» մասնակցության վերաբերյալ որևէ տեղեկություն մինչ այս պահը չկա:
ՀԱԿ փոխնախագահ Լևոն Զուրաբյանը հայտարարում է, որ Սերժ Սարգսյանի դիմադրության ստուգատեսը Մարտի մեկն է՝ վստահեցնելով, որ թեկուզ միայնակ հանրահավաք անելով Կոնգրեսը կկարողանա հրապարակում բավարար չափով մարդ հավաքել: Այս են հայտարարում նաև ՀԱԿ-ի մարզային կառույցների ներկայացուցիչները: Գյումրիի կառույցի ղեկավար Մուրադ Գրիգորյանի խոսքով՝ հանրահավաքը թե՛ թվաքանակի և թե՛ էներգետիկայի առումով կայանալու է:
Այս օրերին Գյումրիում, Վանաձորում, Հրազդանում, Աբովյանում, Աշտարակում և այլ վայրերում մարդկանց թռուցիկներ են բաժանվում մարտի մեկի հանրահավաքին մասնակցելու համար:
«Առաջին լրատվական»-ի հետ զրույցում ՀԱԿ Աշտարակի տարածքային կառույցի ղեկավար Արարատ Մորիկյանն ասաց, որ այս օրերին ակտիվ քարոզ է տարվել՝ հանրահավաքին անպայման մասնակցելու համար, թեպետ ոչ ոք էլ հույս չունի, որ այս իշխանությունների օրոք կբացահայտվի այդ ոճրագործությունը:
Հարցին, թե ինչ է կարծում Կոնգրեսը՝ միայնակ կկարողանա՞ հասնել բացահայտմանը, մեր զրուցակիցը պատասխանեց. «ԲՀԿ-ի մոտ հիմա շոկային վիճակ է, կարող է իրենք էլ հետագայում միանան: Ես ԲՀԿ-ի շատ համակիրների հետ եմ խոսել, իրենք էլ են դժգոհ այս իշխանություններից: Հիմա թե՛ Ծառուկյանի համակիր, թե՛ «Ժառանգության» համակիր բոլորին թերթոնները բաժանել ենք, ով կգա կգա, մենք, միևնույն է, հանրահավաքը անելու ենք»:
Նրա խոսքերով՝ հույսը Կոնգրեսի մոտ չի մարել. «Եթե հույսը մարի, այս երկրում ապրելն անիմաստ է, բայց մենք չենք հուսահատվում ու շարունակում ենք պայքարել: Սրանից երեք տարի առաջ ոչ ոք չէր հավատում, որ Ծառուկյանը դուրս կգա պայքարի, բայց մարդը պայքարեց. հիմա այդքանը ստացվեց իր մոտ: Համենայնդեպս, վիճակ փոխվեց, բոլորն էլ հասկացան, որ եթե Ծառուկյանն է ոտքի կանգնում, ուրեմն այս երկրում վիճակը շատ վատ է: Հիմա մարդիկ ուզում են խոսք լսել, առայժմ ոչնչից տեղյակ չեն, համենայնդեպս, շատ մարդիկ կգան լսելու նախագահ Լևոն Տեր-Պետրոսյանի խոսքը»:
Մեր զրուցակցի կարծիքով՝ առանց հեղափոխության իշխանություններից չեն կարող ազատվել. «Ես ամեն օր մտածում եմ՝ այսօր Սերժ Սարգսյանի վերջին օրն է: Հաշվարկել եմ՝ այդ 5000 դրամը, որ տալիս են ժողովրդին՝ տարին 100 հատ լուցկի է գազ վառելու համար: Կան նաև ազնիվ մարդիկ, որոնք պայքարում են, որ մարդիկ չծախվեն, ես ուզում եմ մարդիկ փոխվեն»:
