Թուրքիայի նախագահ Ռեջեփ Թայիփ Էրդողանը դրական է գնահատել Քրդստանի Աշխատավորական կուսակցությանն ուղղված կոչը՝ վայր դնել զենքը խաղաղ կարգավորման գործընթացի առաջխաղացման համար: Այս մասին նա հայտարարել է շաբաթ օրը՝ օդանավակայանում, Սաուդյան Արաբիա մեկնելուց առաջ՝ գրում է TASS-ը:
«Զենքը վայր դնելու կոչը մեզ համար անչափ կարևոր է։ Այդ կոչն ուղերձ է՝ վերջակետ դնելու կարգավորման գործընթացին: Դա հիանալի է, բայց առավել կարևոր է այն, թե գործնականում այն ինչպես կկիրառվի այս նախընտրական շրջանում»,- ասել է Էրդողանը:
Թուրքիայի նախագահը նաև քննադատել է Քրդական աշխատավորական կուսակցությունում գոյություն ունեցող մի շարք տրամադրություններ, որոնք վերաբերում են Թուրքիայի անվտանգության ուժերի կողմից զենքի կիրառման պարտադիր մորատորիումին:
«Տվյալ դեպքում զենքը պետք է վայր դնի անջատողական ահաբեկչական կուսակցությունը: Նրանք իզուր են սպասում, թե դա կանեն մեր անվտանգության ուժերը: Անվտանգության ուժերը գործիք են: Նրանց կողմից զենքի կիրառման նպատակը հանգստության և անվտանգության ապահովումն է: Չի լինի ահաբեկչական ակտիվություն՝ չի լինի նաև զենքի կիրառում»,- հավելել է Էրդողանը: