ԱՄՆ-ը իր լրտես-արբանյակներից Կիևի իշխանություններին տրամադրում է հետախուզական տվյալներ՝ Ուկրաինայի արևելքում ապստամբների դեմ պայքարին աջակցելու նպատակով: Այդ վիզուալ տեղեկատվությունը, սակայն, «խմբագրվում» և «պահվում է» մեկ օրից ոչ ավելի: Այս մասին գրում է The Wall Street Journal պարբերականը:
«Անցյալ տարի Սպիտակ տունը բավարարել է Ուկրաինայի հարցումը՝ իրենց տրամադրելու լուսանկարներ և այլ հետախուզական տեղեկություններ: Սակայն մինչ այդ տվյալների փոխանցումը՝ ամերիկյան աշխատակիցները ջնջում են Ռուսաստանի տարածքում ռազմական օբյեկտների տեղակայումը և վատացնում լուսանկարների հստակությունը, որպեսզի հակառակորդի տեղակայումն ամբողջությամբ չնշմարվի, ինչը ուկրաինացի հրամանատարների համար նվազեցնում է այդ տեղեկության նշանակությունը»,- ասվում է նյութում:
Ըստ պարբերականի՝ այդ «խմբագրման» նպատակն այն է, որպեսզի նախևառաջ խուսափեն Ուկրաինայի արևելքում ռազմական գործողություններում ԱՄՆ-ի ներգրավումից, երկրորդ՝ որպեսզի Ռուսաստանին չհրահրեն հնարավոր «առավել ագրեսիվ գործողությունների»: Եվ վերջապես՝ դա արվում է գաղտնիության նպատակով՝ այն դեպքերի համար, որ եթե այդ լուսանկարները հայտնվեն ռուս զինվորականների ձեռքում, նրանք չփորձեն հասկանալ ԱՄՆ լրտես-արբանյակների հնարավորությունները:
«ԱՄՆ ներկայացուցիչները հայտարարել են, որ լուսանկարները, որոնք նրանք փոխանցում են ուկրաինացիներին, կոչված են բարձրացնելու նրանց տեղեկացվածությունը Ուկրաինայի տարածքում իրադարձությունների մասին և ոչ թե ռուսական: Այդ ներկայացուցիչները մտահոգվում են, որ ուկրաինական ուժերը կարող են օգտագործել ամերիկյան վիզուալ տեղեկությունը Ռուսաստանի տարածքում հարվածների թիրախ ընտրելու համար, ինչը կարող է թեժացնել լարումը»,- ասվում է պարբերականում:
