«Ազատամարտիկների դաշինք» կազմակերպության անդամները հաստատում են, որ կազմակերպությունը մասնակցելու է մարտի 1-ին ՀԱԿ-ի ու ՀԺԿ-ի կողմից հրավիրված հանրահավաքին:
Կազմակերպության անդամներն այնքան էլ լուրջ սպասելիքներ չունեն հանրահավաքից: Մտածում են, որ այն չի կարող ինչ-որ գործողությունների սկիզբ դառնալ, բայց մյուս կողմից էլ ճիշտ չեն համարում հանրահավաքը բոյկոտելը: «Գնանք տեսնենք, թե Լևոն Տեր-Պետրոսյանը ինչ է ասելու, դրանից հետո կորոշենք»,- ասում են կազմակերպության անդամները:
«Ազատամարտիկների դաշինքում» լուրջ դժգոհություններ են հասունացել, և այդ դժգոհությունն ուղղված է կազմակերպության ղեկավարության դեմ: Ֆորմալ առումով այս կազմակերպությունը միանձնյա ղեկավար չունի, ունի ղեկավար խորհուրդ, որին անդամակցում են 7 հրամանատարներ: Բայց իրականում կազմակերպության ղեկավարը գեներալ-լեյտենանտ, ՊՆ նախկին փոխնախարար Գագիկ Մելքոնյանն է: Հենց նա է ժամանակին եղել ԲՀԿ-ՀԱԿ համագործակցության ջատագովներից մեկը, ԲՀԿ-ի և ՀԱԿ-ի կապավորը: Մելքոնյանն է, որ ազատամարտիկներին մեկ տարի շարունակ հորդորել է սպասել, որ հեսա-հեսա Գագիկ Ծառուկյանը իշխանափոխություն է անելու, և իրենք պետք է պատրաստվեն այն օրվան, որ Ծառուկյանը հանդես գա իշխանափոխության կոչով, իրենք էլ գնան կանգնեն կողքը և օգնեն Ծառուկյանին իշխանափոխության գործը գլուխ բերելու հարցում:
Հիմա բոլորը հասկանում են, որ մեկ տարի շարունակ իրենք խաբված են եղել: Խաբվել են ոչ այնքան Ծառուկյանի, որքան իրենց ղեկավարների կողմից, քանի որ իրենք էլ են մտածել, որ Ծառուկյանը հեղափոխություն անող չի, որ Հայաստանում քաղաքական-սահմանադրական պայքարի միջոցով հնարավոր չի իշխանափոխություն անել, իսկ Ծառուկյանն էլ հեղափոխական ճանապարհով գնացող չէ: Բայց իրենց ասել են` դուք չգիտեք, սպասեք տեսեք` մենք հիմա ինչ ենք անում:
Հիմա, եթե ԲՀԿ ղեկավարը դուրս է եկել քաղաքականությունից, «Ազատամարտիկների դաշինք» կազմակերպության ղեկավարները չեն ուզում նույնիսկ նրան հրապարակայնորեն մեղադրել շարժումը տապալելու, այդքան մարդու հույս տալու և հուսախաբ անելու մեջ: Կազմակերպության շարքային անդամները համոզված են, որ դրա պատճառն այն է, որ կազմակերպության ղեկավարներից որոշները ֆինանսական խնդիրներ են լուծել շարժման հաշվին, Ծառուկյանից գումարներ են ստացել, ու եթե հիմա փորձեն Ծառուկյանին ինչ-որ մեղադրանքներ ներկայացնել, Ծառուկյանը կարող է շատ հեշտությամբ բացահայտել այդ մարդկանց իրական դեմքը, կարող է հրապարակել, թե ամենամսյա ինչպիսի վճարումներ է կատարել կազմակերպությանը, և դրանից պարզ կդառնա, թե այդ գումարներից որ մասն է ծախսվել կազմակերպության նպատակների իրականացման, կազմակերպչական ծախսերի վրա և որ մասն է յուրացվել կազմակերպության ղեկավարների կողմից:
Այս պնդումը նույն չափով վերաբերում է նաև Ծառուկյանի դաշնակից մյուս կուսակցություններին, որոնցից և ոչ մեկը չդատապարտեց Ծառուկյանի դրսևորած քաղաքական վարքագիծը, քանի որ նրանք իրականում ոչ թե դաշնակիցներ են եղել, այլ` վճարովի վարձկաններ: