ԽՍՀՄ նախկին նախագահ Միխայիլ Գորբաչովը կարծում է, որ ընդդիմադիր Բորիս Նեմցովի սպանության պատճառները հարկավոր է որոնել քաղաքականությունում: Այս մասին հայտնում է RIA Novosti-ն:
«Նա այցելում էր Մայդան, բայց պատճառը դժվար Ուկրաինան լինի: Ոչ, դրա արմատները հանում եմ: Գուշակությամբ չէի ուզենա զբաղվել, ես կարծում եմ, որ դա հատուկ մտածված ակցիա է, որի պատճառը հարկավոր է որոնել քաղաքականությունում»,- ասել է Գորբաչովը:
Ֆրանսիայի նախագահ Ֆրանսուա Օլանդը ևս կտրուկ դատապարտել է Նեմցովի սպանությունը: Այս մասին ասվում է Ելիսեյան պալատի պաշտոնական հայտարարության մեջ: Հայտարարության մեջ քաղաքական գործչի սպանությունը անվանվում է «նողկալի»: Բորիս Նեմցովին Օլանդը բնութագրում է որպես «համարձակ ու դեմոկրատիայի համար պայքարելուց չհոգնող, կոռուպցիայի դեմ վճռական պայքարի մարտիկ»: Օլանդը ցավակցել է սպանված քաղաքական գործչի մտերիմներին ու հարազատներին, հայտնում է «Էխո Մոսկվին»:
Ավելի վաղ ռուս ընդդիմադիր քաղաքական գործչի սպանությունը դատապարտել էր ԱՄՆ պետքարտուղար Ջոն Քերին՝ ռուսական իշխանություններին կոչ անելով գտնել և արդարադատությանը հանձնել Նեմցովի սպանության մեղավորներին։
Քերին նշել է, որ Նեմցովը «իր կյանքը նվիրել է ավելի ժողովրդավար, ավելի բարգավաճ և բաց Ռուսաստանին, ինչպես նաև Ռուսաստանի և նրա հարևանների ու գործընկերների, այդ թվում ԱՄՆ-ի միջև հարաբերությունների ամրապնդմանը»։
«ԱՄՆ-ը դատապարտում է Բորիս Նեմցովի դաժան սպանությունը: Ռուսաստանի ղեկավարությանը կոչ ենք անում անցկացնել արագ ու թափանցիկ հետաքննություն և մեղավորներին պատասխանատվության ենթարկել»,- ասվում է ԱՄՆ Ազգային անվտանգության խորհրդի թվիթերյան էջում:
Վրաստանի նախկին նախագահ Միխեիլ Սաակաշվիլին ևս Facebook-ում իր ցավակցություններն է հայտնել Նեմցովի մահվան առնչությամբ: «Բորիս Նեմցովը շատ համարձակ մարդ էր, մի տեսակ շատ հանդուգն: Նրա հետ հնարավոր էր վիճել ու չհամաձայնել, սակայն հնարավոր չէր անտարբեր մնալ:
Ես գիտեի նրան 90-ականների կեսից, մենք հաճախ էինք շփվում, հատկապես վերջին տարիներին:
Կյանքից հեռացավ մյուս ժողովուրդների ընկերը ու միաժամանակ Ռուսաստանի իսկական հայրենասերը, երկրի պարզապես շատ հետաքրքիր մարդկանցից մեկը, որը ղեկավարում են չարակամ միջակությունները: Շատ ափսոս…»,- գրել է վրացի քաղաքական գործիչը:
Ուկրաինայի նախագահ Պյոտր Պորոշենկոն էլ իր հերթին հայտարարել է, որ սպանված ռուս քաղաքական գործիչ Բորիս Նեմցովը կամրջակ է եղել Ուկրաինայի և Ռուսաստանի միջև։ Պորոշենկոյի խոսքով՝ Նեմցովն այն սակավաթիվ մարդկանցից մեկն էր, ում կարելի էր ընկեր անվանել։