Ռոբերտ Քոչարյանի ժամանակ շատ ավելի կոշտ միջոցներ էին կիրառվում ընդդիմադիրների նկատմամբ, և նա շատ ավելի անհանդուրժող էր, քան Սերժ Սարգսյանը. այս մասին մեզ հետ զրույցում նշեց ԱԺ ՕԵԿ խմբակցության պատգամավոր Հովհաննես Մարգարյանը։
Հարցին, թե հիմա, երբ ՕԵԿ-ն ավելի ընդդիմադիր դիրքերից է հանդես գալիս, կոշտ գնահատական է տալիս այս կամ այն նախագծին, մտավախություն չունե՞ն, որ երբ ռեալ վտանգ ներկայացնի, նույն ճակատագրին կարժանանա, ինչ ԲՀԿ-ն, Հովհաննես Մարգարյանը պատասխանեց. «Մենք միշտ էլ կոշտ ենք արտահայտվել այն հակասահմանադրական ու հակաժողովրդական օրենքների մասին, որոնք դժվարեցնում են ժողովրդի կյանքը։ Միշտ դեմ ենք եղել հարկային բեռի ավելացմանը, այն օրենքներին, որոնցով փորձել են մենաշնորհել տնտեսական դաշտը, այդ թվում՝ այն օրենքներին, որոնք չեն երաշխավորել տնտեսական հավասար մրցակցություն»։
Նրա խոսքերով՝ 2003-2006 թվականներին, երբ ՕԵԿ-ը դեռ իշխող կոալիցիայում էր, դեմ է հանդես եկել շատ օրենքների։ «Շուրջ 4 տարի օրակարգում լինելով՝ չընդունվեց օպերատիվ հետախուզության մասին հակասահմանադրական օրենքը, ըստ որի՝ առանց դատարանի որոշման կարելի է գաղտնալսում իրականացնել։ Այդ օրենքը ընդունվեց միայն 2007-ին։ Այսինքն՝ ՕԵԿ-ի կողմից եղել է պայքար։ Բացօթյա առևտուրն արգելող օրենքը ևս ընդունվեց 2007-ին, երբ ՕԵԿ-ն արդեն ընդդիմություն էր։
Երբ մենք 2006-ին դուրս եկանք կոալիցիայից, մեր նկատմամբ հիշո՞ւմ եք՝ ինչ եղավ։ Իհարկե կլինեն հետապնդումներ, ճնշումներ։ Իհարկե եղել են ճնշումներ, բայց երբ համադրում ես, տեսնում ես, որ այն ժամանակ միջոցները շատ ավելի կոշտ էին, ավելի անհանդուրժող էին իշխանությունները։ Թեկուզ նախկին ու ներկա նախագահներին համեմատեք։ Մենք մեր կաշվի վրա ենք զգացել։ Ես հիշում եմ, թե մեզ հետ ինչ կատարվեց, երբ Բուզանդի բնակիչների հարցով դիմեցինք ՍԴ։
Ռոբերտ Քոչարյանի ժամանակ շատ ավելի կոշտ միջոցներ էին կիրառվում, և նա շատ ավելի անհանդուրժող էր, քան Սերժ Սարգսյանը»,- ընդգծեց նա։
Ավելին՝ տեսանյութում: