Անցած տարի Նոր Նորք-ի 7-րդ զանգվածում ծեծելով ազատամարտիկ Վարդան Թումանյանին սպանած Ջունգլ մականունով Գևորգ Սարգսյանը քրեակատարողական հիմնարկում կոտրել է իր երկու ոտքը և հիմա գտնվում է դատապարտյալների հիվանդանոցում: Այս մասին «Առաջին լրատվական»-ին փոխանցեց ազատամարտիկի քույրը՝ Մարիետա Թումանյանը: Նա ասաց, որ այդ տեղեկությունն իրեն փոխանցել են քրեակատարողական հիմարկից:
Տիկին Մարիետան վստահ է, որ Ջունգլը դա միտումնավոր է արել, որպեսզի փոխի գործի ընթացքը: «Այդ կենդանին միտումնավոր է կոտրել ոտքերը, որպեսզի փոխի գործի ընթացքը, գործն այլ ուղղությամբ տանի: Սրանից հետո ինքը դրանով ցույց կտա, որ իր այդ «ինվալիդ» կարգավիճակով չի կարող լիարժեք մասնակցել քննությանը: Իր այդ կարգավիճակն էլ կդիտվի մեղմացուցիչ հանգամանք, ու նրան ազատ կարձակեն, պատիժը պայմանական կտան»,- կարծիք հայտնեց տիկին Մարիետան՝ հավելելով, որ Ջունգլի այդ արարքում ոչ մի զարմանալի բան չկա, քանի որ եթե նա ընդունակ է օրը ցերեկով բնակելի շենքի բակում իր հոր և եղբոր հետ ծեծելով մարդ սպանել, ապա կարող է և բանտում չփտելու համար կոտրել ոտքերն ու մեղմացնել պատիժը:
Ազատամարտիկի քույրը, սակայն, շատ վրդոված էր և ավելացրեց. «Եթե այդ Ջունգլ կոչված կենդանին չկրի իր պատիժը սահմանված ձևով և ժամանակից շուտ դուրս գա բանտից, ես իմ ձեռքերով կսպանեմ նրան: Դա թող բոլորը իմանան»:
Հիշեցնենք, որ դեպքը տեղի է ունեցել անցած տարի: Վեճը ծագել էր Վարդան Թումանյանի և Ջունգլի հոր՝ Բաբկեն Սարգսյանի միջև նարդու սեղանի շուրջ: Ապա վեճն ավելի էր թեժացել, միմյանց քաշքշել էին, ու Բաբկենը դիմել էր որդու օգնությանը, ով «Էլլա» գիշերային ակումբի անվտանգության աշխատակիցներից էր: Նա հոր և երկու եղբայրների հետ Վարդանին ծեծել էին հենց շենքի բակում, կնոջ և աղջկա աչքի առաջ: Այն աստիճան էին ծեծել, որ հիվանդանոցում մահացել էր: Դեպքի առիթով քրեական գործ է հարուցվել, որի շրջանակներում միայն Ջունգլն ու նրա ազգական Սարգիս Ղուկասյանն են կալանավորված: Ծեծին մասնակից երրորդ անձը՝ Վիկտորը, մինչ օրս փախուստի մեջ է, որի նկատմամբ հետախուզում հայտարարված է, իսկ Ջունգլի հայրը՝ Բաբկեն Սարգսյանը, ազատության մեջ է՝ ստորագրությամբ չբացակայելու պայմանով:
