Հյուսիսային Կիպրոսի ինքնահռչակ թուրքական հանրապետության նախագահ Դերվիշ Էրօղլուն Թուրքիայի և Ադրբեջանի կողմից հորինված «Խոջալուի կոտորածի» 23-րդ տարելիցի առթիվ ուղերձ է ուղարկել Ադրբեջանի նախագահ Իլհամ Ալիևին։ Այս մասին գրում է թուրքական «Իհլաս» լրատվական գործակալությունը։
Էրօղլուն, միանալով «Խոջալուի դեպքերի» քարոզի շրջանակներում Թուրքիայի և Ադրբեջանի կողմից իրականացվող հակահայ արշավին, հայտարարել է, որ Հյուսիսային Կիպրոսի թուրքերը կիսում են իրենց եղբայրների ցավը։
«Մենք նույնպես անցել ենք բազմաթիվ դժվարությունների միջով։ Ուստի դատապարտում ենք հայերի կողմից Խոջալուում (գյուղ Իվանյան՝ Արցախի Ասկերանի շրջանում – խմբ.) մեր եղբայրների կոտորածը, կիսում ենք ձեր ցավն ու հայտարարում, որ կանգնած ենք ադրբեջանցի ժողովրդի կողքին։ Ձեր հայրը՝ Հեյդար Ալիևը, որը մեր բարեկամն ու եղբայրն էր, դրեց Ադրբեջանի սոցիալական և տնտեսական զարգացման հիմքը, և մենք ուրախ ենք, որ այն շարունակվում է ձեր օրոք։
Թուրքիայի, Ադրբեջանի և Հյուսիսային Կիպրոսի Թուրքական Հանրապետության դեպքում գործում է մեկ ազգ, երեք պետություն գաղափարը։ Մենք մշտապես միասին ենք լինելու», – ասել է Էրօղլուն։
Թուրքիան 1974 թվականից բռնազավթել է Կիպրոսի հյուսիսային հատվածը, որը ստացել է «Հյուսիսային Կիպրոսի Թուրքական Հանրապետություն» անվանումը, իսկ այն որպես անկախ պետություն ճանաչված է միայն Անկարայի կողմից։ Ներկայում Թուրքիան Կիպրոսի հյուսիսում պահում է մեծաքանակ զինված ուժեր, որոնք թեև պայմանականորեն պատկանում են ՀԿԹՀ-ին, սակայն իրականում հենց Թուրքիայի զինված ուժերի մի մասն են։