Մոսկվայում 3 ավազակային հարձակում է եղել բանկերի վրա: Հանցագործները մեկուկես մլն ռուբլի են գողացել: Կողոպտիչների բանդան ձերբակալված է, հայտնում է «ՄԻՐ 24»-ը:
Վոլգոգրադի մարզի բնակիչները և ծնունդով ադրբեջանցիները հարձակումներ են գործել ֆինանսավարկային հաստատությունների վրա՝ օգտագործելով ատրճանակներ և դանակներ: Նրանք պահանջել են բացել դրամարկղը, վերցրել են առձեռն գումարն ու հանցանքի վայրից փախել ավտոմեքենայով: Արդյունքում հենց մեքենայի միջոցով են բռնել հանցագործներին:
«Օպերատիվ-որոնողական միջոցառումների իրականացման ժամանակ Մոսկվայի քրեական հետախուզության 18-րդ բաժանմունքի խուզարկուները Իզմաիլովսկի մայրուղու №57 տան մոտ հայտնաբերել են հանցագործների օգտագործած ավտոմեքենան: Զննության արդյունքում ավտոմեքենայի սրահում հայտնաբերվել և առգրավվել են գազային և պնևմատիկ ատրճանակներ»,- պատմել է բաժանմունքի մամլո քարտուղար Մարգարիտա Մասլովան:
Ներկայումս պարզվում է՝ արդյո՞ք ձերբակալվածներն այլ զինված հարձակումների ևս մասնակցել են: