Մահից 3 ժամ առաջ ռուս ընդդիմադիր քաղաքական գործիչ Բորիս Նեմցովն իր վերջին հարցազրույցն է տվել «Էխո Մոսկվի» ռադիոկայանին՝ պատմելով մարտի 1-ին ծրագրված «Գարուն» հակաճգնաժամային երթի մասին, որը պետք է տեղի ունենար Մոսկվայի Մարինո շրջանում։
Նա եթերում հանդես է եկել երթին մասնակցելու կոչով։ «Մենք մշակել ենք և հրապարակել մեր երթի պահանջները։ Կան քաղաքական և սոցիալ-տնտեսական բնույթի պահանջներ»,- ասել է Նեմցովը։ Նա նշել է ընդդիմության որոշ պահանջներ, որոնցից է Ուկրաինայի հետ պատերազմի անհապաղ դադարեցումը, ընդդիմության մասնակցությամբ արդար ընտրությունների անցկացումը, գրաքննության վերացումը, հայտնի բոլոր կոռուպցիոն գործերը դատարանին հանձնելը, բյուջեի 50/50 ապակենտրոնացումը, ռազմական ծախսերի կրճատման հաշվին կրթության ու առողջապահության ծախսերի մեծացումը։
Նրա խոսքով՝ պետք է գործել ոչ թե ինչ-որ մեկի ցանկությամբ, այլ օրենքով՝ պահպանելով միջազգային նորմերը, մինչդեռ Ղրիմի բռնակցմամբ Պուտինը խախտել է Ռուսաստանի միջազգային մեծ թվով պարտավորություններ։ Նա նշել է, որ Պուտինը խախտել է Միջուկային զենքի չտարածման միջազգային համակարգը, ինչը հանցագործություն է։ Նա ճգնաժամի կարևոր պատճառներից է համարել Պուտինի կողմից Ուկրաինայի հետ խելահեղ ագրեսիվ և իրենց երկրի ու ժողովրդի համար մահաբեր պատերազմական քաղաքականություն սկսելը։ Նա երկրի պատուհասն անվանել է «ձեռագործ»։
«Երբ իշխանությունը կենտրոնացած է մեկ մարդու ձեռքում, ապա դա միշտ աղետով է ավարտվում»,- ասել է ընդդիմադիր գործիչը։
Նեմցովի խոսքով՝ երբ ինքը վառելիքա-էներգետիկ հարցերով նախարար էր, նավթն արժեր 10 դոլար, իսկ 20 դոլարի մասին երազել կարող էր միայն էրոտիկ երազում։ Իսկ այժմ նավթի գինը 60 դոլար է, և ամեն ինչ ձախողվել է։
«Ճգնաժամի խորը պատճառներից մեկը տնտեսության չափազանց անարդյունավետ մոդելն է։ Այդ մոդելը հիմնված է մենաշնորհների, պետական կորպորացիաների, ագահ, շատ ոչ պրոֆեսիոնալ և հակահայրենասիրական բյուրոկրատիայի կառավարման վրա»,- ասել է նա՝ հավելելով, որ հենց նրանք են կողմ հանդես գալիս Ռուսաստանի օֆշորացմանը…»։
Մասնակցության կոչ անելով՝ Նեմցովը հայտնել է, որ «Արյունալի Մայդանի» սպառնալիք չկա։