«Առաջին լրատվական»-ի Realpolitik հաղորդաշարի հյուրն է հանրապետական պատգամավոր Կարինե Աճեմյանը
– Քաղաքական դաշտը վերջնականապես ամայացնելուց հետո ՀՀԿ-ի առջև կանգնած ամենամեծ խնդիրը սահմանադրական բարեփոխումներն են: Ըստ էության, մենք կարծում էինք, որ Սերժ Սարգսյանի կարծիքը սահմանադրական բարեփոխումների վերաբերյալ ուշանում է, որովհետև ամենամեծ խնդիրը, որ դրված էր ՀՀԿ-ի և նախագահի առջև, այդ խնդրի վերաբերյալ կոնսոլիդացիա կամ համաձայնություն առաջացնելն է: Կարծում եք, որ այն, ինչ տեղի ունեցավ ԲՀԿ-ի հետ և դրանից հետո, սահմանադրական փոփոխությւնների փաթեթի վերաբերյալ քաղաքական ուժերի հնարավոր վերաբերմունքը այն վիճա՞կն է ստեղծելու ՀՀԿ-ի համար, որը թույլ կտա անարգել սկսել փոփոխությունների գործընթացը:
– Ամայացնելու վերաբերյալ ձևակերպմանը համաձայն չեմ, որովհետև մենք այդպիսի նպատակներ երբեք չենք ունեցել: Ընդհակառակը, եթե մենք ասում ենք, որ ընդդիմություն ենք ուզում, ուժեղ ընդդիմադիր դաշտ, ապա դա անկեղծ ենք ասում, որովհետև իմ խորին համոզմամբ՝ դա շատ կարևոր է: Ցավոք սրտի, այսօր և՛ իշխանությունը, և՛ ընդդիմությունը մեծ խնդիրներ ունի: Մենք խնդիրներ ունենք, որովհետև ուժերի գերլարում է պետք, որպեսզի կարողանանք և՛ տնտեսությունը կարգի բերենք, և՛ կարողանանք մեր անվտանգությունը ապահովել: Անվերժ խոսում ենք, բայց մենք ներսում ջլատվում ենք, չենք կարողանում համախմբվել: Իսկ դա տրամաբանական լուծում էր, որովհետև քաղաքական ուժը խորհրդարանում, այնուամենայնիվ, պետք է հստակ լինի իր դիրքորոշումներում: Ես կողմ եմ խորհրդարանի դասական ձևին, որտեղ կա ընդդիմություն, և կա իշխանություն: Մանևրել կարելի է, բայց չի կարելի է անընդհատ ասել, որ ես այլընտրանք եմ, բայց հայհոյել, ամենածայրահեղ գնահատականը տալ, և որ ամենակարևորն է՝ իշխանափոխության կոչեր անել: Այսինքն, դու պետք է ինչ-որ ձևով հասկանաս, քո դիրքորոշումները հսակեցնես: Այո, այսօր ընդդիմադիր դաշտում կան խնդիրներ, մենք շատ կուզենք, որ առողջանա այդ դաշտը: Բայց մենք տեսնում ենք, որ ոչ միայն հոյհոյում են իշխանություններին, այլև խմբակցությունների ներսում առանձին անդամներ չեն կարողանում իրենց հարցերը լուծել: Ես ցավ եմ ապրում, երբ տեսնում եմ, որ նույն խմբակցության անդամները իրար հետ հաշիվ են մաքրում հենց ամբիոնում: Դա ինձ համար անընդունելի է, որովեհտև ես կուսակցական կարգուկանոնի կողմնակից եմ, իսկ կուսակցությունը կորպորատիվ շահ է ենթադրում:
Ես համարում եմ, որ յուրաքանչյուր կուսակցական մարդ պետք է կարողանա իր կուսակցության գաղափարներին հավատարիմ լինել: Բայց ինչո՞ւ է այսօր այդ վիճակը: Ամեն ինչ գալիս-հանգում է նրան, որ կուսակցություններում չկան այն լիդերները, ովքեր կպարտադրեն այդ կուսակցական կարգապահությունն, ու կպարտադրեն, որ գնան այն ուղղությամբ, որի հետևից գնում են այդ մարդիկ: Եթե դա չկա, կուսակցությունն էլ չի կարող ուժեղ լինել:
–ՀՀԿ-ն անվանարկում է այդ լիդերներին, ոչնչացնում նրանց:
–Ես չեմ համարում, որ դա ճիշտ է: Մենք 21-րդ դարում ենք ապրում, և կարելի է առանց հայհոյելու, քաղաքակիրթ մեթոդներով պայքարել իրար դեմ: Ինքս համարում եմ, որ չի կարելի նման ծայրահեղ ձևակերպումներով հանդես գալ, և մենք պետք է անենք ամեն ինչ, որպեսզի Հայաստանում ընդդիմությունը կազմակերպվի: Մենք գնում ենք դեպի 2017թ. Ընտրություններ, և շատ կարևոր է, որպեսզի ունենանք այդ առողջ, կառուցողական ընդդիմությունը:
Ինչ վերաբերում է երկրորդ հարցին, ապա մենք ոչ մի բանից չենք ուշացել՝ սահմանադրական բարեփոխումների հետ կապված: Դա ընթացակարգ ունի, և մենք ընթացակարգով, ժամանակացույցով շարժվում ենք առաջ: Կգա ժամանակը, և կսկսվեն արդեն հանրային քննարկումները, որից հետո հանրաքվեի կդրվի սահմանադրական բարեփոխումների փաթեթը:
– Այսինքն՝ գործընթացն անշրջելի է, Դուք կարծում եք, որ փաստաթուղթը հաստատապես ստեղծվելու է:
– Փաստաթուղթն արդեն պատրաստ է, և այն միայն հանրաքվեով պետք է որոշվի: Անընդհատ այդ աշխատանքը տարվում է, որովհետև Սահմանադրության շատ կետեր կան, որոնք խմբագրման կարիք ունեն: Եվ դա էլ է շատ կարևոր, որովհետև մենք գիտենք, որ բոլոր քաղաքակիրթ երկրներում ժամանակ առ ժամանակ լինում են այդ սահմանադրական բարեփոխումները, որովհետև կյանքը փոխվում է, մենք շարժվում ենք առաջ:
– Իսկ այդ փաստաթղթի շուրջ համաձայնություն, կոնսոլիդացիա առաջացնելու վերաբերյալ ի՞նչ կասեք:
– Դուք գիտեք, որ նույնիսկ Դաշնակությունը կողմ է այդ փաստաթղթին, և ես կարծում եմ, որ քննարկումների ընթացքում այդ կոնսոլիդացիան կարող է իրականացվել, որովհետև քաղաքական դաշտում բացարձակ «ոչ»-եր, բացարձակ «այո»-ներ չկան: Այսինքն՝ կարող են լինել քննարկումներ: Մենք միշտ բաց ենք եղել, ՀՀԿ-ն և կուսակցության նախագահը միշտ քննարկումների համար բաց են, քայլ են անում: Այդ առումով ՀՀԿ-ն շատ կարևորում է համագործակցությունը, բայց նաև թույլ չի տալու, որ այս իրավիճակում ապակայունացնեն մթնոլորտը. դա շատ վտանգավոր է մեր երկրի համար:
Եթե դու քաղաքական գործիչ ես, հայրենասեր ես, մարդ ես, որի վրա պատասխանատվություն կա, ապա այդ անվտանգություն բառը ոչ միայն պետք է օգտագործես, այլև հասկանաս դրա իմաստն ու կարողանաս ինքդ էլ նպաստել, որպեսզի պատերազմական վիճակում չսրենք ու չլարենք իրավիճակը: