Իրանի նախագահ Հասան Ռոհանին կարծում է, որ ԱՄՆ-ը պետք է վերանայի Թեհրանի միջուկային ծրագրի վերաբերյալ բանակցություններին իր մոտեցումը: IRNA գործակալության հաղորդմամբ՝ Իրանի և «վեցյակի» բանակցությունների թեմային են նվիրված եղել Կում քաղաքում գործադիր իշխանության ղեկավարի և խոշոր կրոնական գործիչների հանդիպումները:
«Հենց ամերիկացիները պետք է փոխեն սխալ մոտեցումն Իրանի միջուկային ծրագրի հանդեպ»,- ասել է Ռոհանին:
Նա, մասնավորապես, ԱՄՆ-ին մեղադրել է 2004 թ. բանակցությունների տապալման համար: Ըստ Ռոհանիի՝ դեռ այն ժամանակ հնարավորություն է եղել վերջնական համաձայնություն կնքելու:
«Մեր հարաբերություններն աշխարհի երկրների, ներառյալ՝ Չինաստանի և Ասիայի այլ պետությունների հետ հիմա զգալիորեն ակտիվացել են,- Ռոհանիի խոսքը մեջբերում է IRNA-ն:- Նկատելի է նաև համագործակցության ընդլայնումը Եվրոպայի երկրների հետ: Բայց միաժամանակ մենք չենք մոռանում, որ միջուկային խնդիրը մեր արտաքին քաղաքականության հիմնական հարցն է, որի լուծումը կոչված է հակառակորդին զրկելու պատժամիջոցների տեսքով նրա ճնշման զենքից»: «Մենք հակառակորդին կոչ ենք անում վայր դնել այդ զենքը,- ասել է Ռոհանին,- քանի որ պատժամիջոցները միաժամանակ և՛ անարդար են, և՛ ոչ արժանի, և՛ խիստ, ինչպես նաև մարդու իրավունքները խախտող: Իսկ այդ նպատակին հասնելու համար բանակցությունները լավագույն միջոցն են»:
Իրանական ԶԼՄ-ներին տված հարցազրույցում նա վստահություն է հայտնել, որ ժամանակն արդեն սկսում է ամեն ինչ իր տեղը դնել: Ռոհանիի խոսքերով՝ ամբողջ աշխարհի համար ակնհայտ է դառնում փաստը, որ ներկայիս բանակցությունների տապալման դեպքում դրա մեղավորը կլինեն արևմտյան պետությունները: ԱՄՆ-ը փաստացի դա արդեն խոստովանում է՝ փորձելով Կոնգրեսին համոզել նոր պատժամիջոցներ չսահմանել Իրանի դեմ, նշել է նա: