Ֆրանսիան և Մեծ Բրիտանիան չեն բացառում իսլամիստների դեմ պայքարի նպատակով «Սիրիայում առկա ռեժիմի որոշ կառույցների» հետ համագործակցության հնարավորությունը, բայց միաժամանակ վստահ են, որ Սիրիայի նախագահ Բաշար Ասադը պետք է վայր դնի նախագահի լիազորությունները: Le Monde-ի տեղեկացմամբ՝ այսպիսի կարծիք են հայտնել Ֆրանսիայի և Մեծ Բրիտանիայի ԱԳՆ ղեկավարները:
«Բաշար Ասադը խաղում է ծայրահեղականների առաջացրած վախի զգացման վրա և փորձում է իրեն ներկայացնել որպես ինչ-որ ամրոց»,- Le Monde թերթի համար համատեղ հոդվածում գրել են Ֆրանսիայի և Մեծ Բրիտանիայի ԱԳՆ ղեկավարներ Լորան Ֆաբիուսն ու Ֆիլիպ Համոնդը: Այդուհանդերձ, ըստ երկու նախարարների, դրան տեղի տալը սխալ կլիներ: Փարիզում և Լոնդոնում նախկինի պես համոզված են, որ հենց Ասադն է «լիովին պատասխանատու» Սիրիայի 220.000 քաղաքացների մահվան և մի քանի մլն փախստականների համար:
Միևնույն ժամանակ, Ֆաբիուսն ու Համոնդը խոստովանում են. «Մեր սեփական անվտանգության համար մենք պետք է վերջ տանք ԴԱԻՇ-ին («Իրաքի և Շամի իսլամական պետություն») Սիրիայում»: «Մեզ գործընկեր է անհրաժեշտ ծայրահեղականներին դիմակայելու համար»,- նշում են ԱԳՆ ղեկավարները: Նրանց խոսքով՝ այդպիսի իրավիճակում միակ հնարավոր գործընկեր կարող է լինել միայն «ազգային միասնության կառավարությունը», որը ձևավորվել է «չափավոր ընդդիմության և Սիրիայում արդեն գոյություն ունեցող ռեժիմի որոշ կառույցների» ներկայացուցիչներից:
«Ակնհայտ է, որ Բաշար Ասադը չի կարող ընդգրկված լինել այդպիսի ձևաչափի շրջանակներում»,- եզրափակում են Ֆաբիուսն ու Համոնդը: