Ռուս նախկին օլիգարխ Միխայիլ Խոդորկովսկին, փետրվարի 26-ին ելույթ ունենալով Լոնդոնում Միջազգային հարաբերությունների թագավորական ինստիտուտում, հայտարարել է, որ Վլադիմիր Պուտինի դարաշրջանը մոտենում է ավարտին: «Մերկ իրանով Պուտինը հզոր առաջնորդ չէ. նա մերկ թագավոր է»,- Reuters-ը մեջբերում է Խոդորկովսկու խոսքը:
Խոսելով Ռուսաստանի նախագահի արտաքին քաղաքական դոկտրինի մասին՝ Խոդորկովսկին հայտարարել է, որ Պուտինի վերջնական նպատակները շատ ավելի հեռուն են ձգվում, քան թվում է: «Պուտինին Դոնբասը պետք չէ: Նա ուզում է որոշել աշխարհի ճակատագիրն ԱՄՆ նախագահի հետ բանակցություններում»,- նշել է նա: Ռուսաստանի նախագահը կուզենար ԱՄՆ-ի հետ պայմանավորվել, որպեսզի վերադառնար հին սխեմային, երբ աշխարհը բաժանված էր գերտերությունների ազդեցության գոտիների: «Միաժամանակ դուք չեք կարող միջամտել հակառակորդի ազդեցության գոտուն: Էլ չասած՝ ներքին քաղաքականության մասին»,- հավելել է Խոդորկովսկին:
Նախկին օլիգարխի խոսքով՝ եկել է Պուտինի իշխանության մայրամուտի ժամանակը, բայց նրա նախագահության եզրափակիչը, որը սկսվել է 1999թ., կարող է ցավոտ և վտանգավոր լինել ինչպես Արևմուտքի, այնպես էլ Ռուսաստանի համար: «Ռուսաստանը պետք է բավական երկար կանգնի հիվանդ կայսեր մահճի մոտ՝ սարսափով հետևելով ռեժիմի հոգեվարքին»,- ասել է Խոդորկովսկին: Նա վստահ է, որ երկրի տնտեսությունը հետագայում ևս կթուլանա, իսկ դա, անշուշտ, կհանգեցնի թշնամական հզոր կլանների միջև պայքարի, որոնք այսօր գերիշխում են Ռուսաստանում:
Խոդորկովսկին Արևմուտքի երկրներին կոչ է արել պուտինյան իշխանության վերջի սպասման մեջ ամրապնդել կապերը ռուս ընդդիմադիրների հետ: «Վաղը, երբ ռեժիմը փոխվի, դուք ստիպված կլինեք հարաբերություններ կառուցել, բայց դուք չափազանց քիչ ժամանակ կունենաք»,- ասել է Խոդորկովսկին: