Օֆշորային հայտնի սկանդալի պատճառով սնանկացման եզրին հասած գործարար Փայլակ Հայրապետյանին զայրացրել է փաստը, որ «Ամերիաբանկն» այս տարի բարձր ցուցանիշներ է գրանցել՝ ակտիվների աճը 2014 թվականին հասցնելով 27%-ի: Տարեվերջի տվյալներով՝ բանկի ակտիվները հասել են շուրջ 400 մլն դրամի:
«Մի քանի օր առաջ ամբողջ հետուստատեսությունը ողողվել էր լուրերով, թե «Ամերիաբանկը» ճանաչվել է ամենահզոր, ամենաեկամտաբեր բանկը: Իհարկե, այդ բանկը կարող է ճանաչվել ամենաեկամտաբերը, քանի որ արդեն մի քանի տարի է՝ խլել է ուրիշի ունեցվածքը և հանել է վաճառքի: Այսօր բանկն իմ ամբողջ ունեցվածքը դրել է վաճառքի: Հսկայական մասն արդեն վաճառել է, մի մասն էլ դեռ վաճառում է: Բա կհարստանան, բա ինչ կանեն»,- «Առաջին լրատվական»-ի հետ զրույցում վրդովված ասաց Հայրապետյանը:
Նրա խոսքով՝ այս ամենի հիմնական, գլխավոր մեղավորը բանկի խորհրդի նախագահ Ռուբեն Վարդանյանն է: Նա, լինելով խելամիտ մարդ, ծանոթանալով «Ամերիաբանկի» կողմից Աշոտ Սուքիասյանի համար գրված բիզնես-պլանին, արդեն իսկ պետք է համաձայնություն չտար այդ գործարքին: Բայց կատարվեց հակառակը: Ինչ-որ հայտնի զանգերից հետո բանկը համաձայնեց տրամադրել այդ խոշոր վարկը, ինչի պատճառով ինքը՝ Հայրապետյանը, սնանկացավ, իսկ բանկը, վաճառելով գործարարի 33 միլիոնից ավել արժողությամբ ունեցվածքը, հարստանում է:
«10 անգամ իմ կողմից գրավադրված ունեցվածքի հիման վրա բանկը գումար է բաց թողել Աֆրիկայում գտնվող հանքի ամրացման համար, այն դեպքւոմ, երբ ոչ մի հանք էլ գոյություն չունի: Իսկ բիզնես-ծրագիրը գրել էր նույն բանկը, և շատ լավ գիտեին, որ ոչ մի հանք էլ գոյություն չունի: Բայց իրենք բանկից դրա համար գումար էին դուրս գրում և ուղարկում օֆշորային գոտի՝ Տիգրան Սարգսյանի, Աշոտ Սուքիասյանի և Կճոյանի հաշիվների վրա: Եվ այս ամենը կատարվել է «Ամերիաբանկի» ղեկավարության համաձայնությամբ»,-հավելեց Փ.Հայրապետյանը:
Ի դեպ, նրա խոսքով՝ բանկն «այնքան է լկտիացել», որ իրեն չի էլ տեղեկացնում իր այս կամ այն գույքի վաճառքի մասին: «Սուս ու փուս իրենց մեջ իրենց ուզած գնով ում ուզում՝ վաճառում են: Ինձ ոչ մի հարցում տեղյակ չեն պահում: Բա էս պայմաններում կհարստանան, բա ինչ կանեն: Ի՞նչ է եղել, որ այս պայմաններում ամենաառաջատար բանկը չճանաչվեն»,-ասաց գործարարը՝ հավելելով. «Էս երկրում ինչ կատարվում է, ժողովուրդն ինչից դժգոհում է՝ այդ բոլորը մեր բանկերն են անում, մարդկանց կանխամտածված հասցնում են սնանկության: Այդ ամենի համար Վարդանյանի նմաններն են պատասխանատու: Բայց մեր երկրի նախագահը չի հասկանում, որ իրեն շրջապատում են Վարդանյանի նման հանցագործ այլանդակները»:
Ինչ վերաբերում է քրեական գործին, ապա, Հայրապետյանի խոսքով, իրեն մանրամասներին չեն ծանոթացնում: Երբ զանգահարում է քննիչին, ասում է, որ ստուգումներ են իրականացնում, երբ ավարտեն, կկանչեն իրեն: «Միայն հայտնի է, որ ես, որդիս և իմ մեկ այլ ազգական տուժող ենք ճանաչվել, և առաջիկայում, երբ, քննիչի խոսքով, ստուգումներն ավարտվեն, մեզ նորից, որպես տուժողների, պետք է լրացուցիչ հարցաքննեն»,- ասաց Հայրապետյանը՝ ընդգծելով, որ մինչ օրս այս գործի գլխավոր հերոսները՝ Տիգրան Սարգսյանն ու Կճոյանը, որևէ ձևով չեն անցել գործով և որևէ կարգավիճակ չունեն:
Հիշեցնենք, որ այս քրեական գործով անցնող Աշոտ Սուքիասյանին մեղադրանք է առաջադրվել առանձնապես խոշոր չափերով խարդախության (ՀՀ. Քր. օր. 178-րդ հոդվածի 3-րդ մասի 1-ին կետ), խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու (184-րդ հոդ. 2-րդ մասի 1-ին կետ) և հանցավոր ճանապարհով ստացված առանձնապես խոշոր չափերով եկամուտներն օրինականացնելու (190-րդ հոդ. 3-րդ մասի 1-ին կետ) համար: Նա Հայրապետյանի հետ մի քանի անգամ առերեսվել է և այս պահին էլ կալանավորված է: