«Առաջին լրատվական»-ի զրուցակիցն է ԱԺ «Ժառանգություն» խմբակցության ղեկավար Ռուբիկ Հակոբյանը:
– Պարոն Հակոբյան, 2006-ին ստեղծված ուժը՝ ԲՀԿ-ն, մեկ գիշերվա ընթացքում արմատական գործողություններից հետ կանգնեց: Ի՞նչ պետք է անեն իշխանության թույլատրած ռուբիկոնը անցած ընդդիմադիր ուժերը, որպեսզի իշխանությունների կողմից չենթարկվեն բիրտ գործողությունների:
– ԲՀԿ-ի հետ կատարվածը քաղաքական խորը համակարգային ճգնաժամի արդյունք է: Մենք այսօր ապրում ենք քաղաքական խորը ճգնաժամ, և այդ ճգնաժամն ուղղորդվում է իշխանությունների կողմից: Ի՞նչ պետք է անի ընդդիմությունը. պետք է կարողանա այնպիսի կեցվածք որդեգրել, որ իշխանությունը նման բիրտ ուժի չդիմի: Իսկապես իշխանությունը միշտ գործում է հակաօրինական դաշտում, օգտագործում է ռեպրեսիվ կառույցներն իր քաղաքական հակառակորդներին քաղաքական բեմից հեռացնելու համար, դիմում է հակաօրինական քայլերի, բայց իր ռեպրեսիվ նույն կառույցների միջոցով միշտ փորձում է ընդդիմությանը պահել այն դաշտում, որտեղ խաղի կանոնների հեղինակը և տերը ինքն է: Ընդդիմությունը շատ համարժեք պետք է կարողանա դառնալ իշխանության քայլերի նկատմամբ: Եթե իսկապես իշխանությունը հակաօրինական դաշտում է գործում, ընդդիմությունը պետք է հասկանա, որ ինքն էլ պետք է համարժեք գործի, այլապես ստացվում է այնպես, որ քաղաքական պայքարի քաղաքակիրթ ճանապարհը փակվում է:
Վերջին դեպքերի հետ կապված ես վերջնական գնահատական չեմ տվել և չեմ տա, քանի դեռ ամբողջ ինֆորմացիային չեմ տիրապետում: Ես հասկանում եմ, որ օգտագործվեց գաղտնի ծառայությունների հոգեբանական գրոհի պահը, որովհետև չեմ կարծում, որ իշխանությունը կկրակեր, բայց իրենք մեկ ամբողջ շաբաթ շարունակ կարողացան ամբողջ եթերը և էլեկտրոնային մամուլը լցնել նրանով, որ եթե ժողովուրդ հավաքվի, իրենք կկրակեն՝ չհասկանալով, որ երբ ասում ես՝ կկրակեմ, դու ասում ես, որ չես պատրաստվում օրենքի դաշտում իրականացնել քո գործառույթները:
– Այդ դեպքում ինչո՞ւ վախի գերին դարձավ ԲՀԿ-ն: Ինչո՞ւ Գագիկ Ծառուկյանը այդ վստահությունը չուներ, որ չեն կրակի:
– Յուրաքանչյուրն իր սուբյեկտիվ պատկերացումն ունի, մեկն էլ կարող է ասել՝ ես վստահ եմ, որ կկրակեին, բայց ես ասում եմ, որ մարտի մեկից հետո որևէ իշխանություն թույլ չի տա կրակել ժողովրդի վրա: Բայց իշխանությունն ունի բոլոր լծակները՝ հոգեբանական ճնշում գործադրելու, քարոզչական ամբողջ դաշտը՝ 80 տոկոսը, իր հսկողության տակ է: Խնդիրն այն է, որ ընդդիմությունը պետք է դասեր քաղի, և եթե արմատական կեցվածքով ասում է՝ գնում եմ ամբողջական իշխանափոխության, պետք է բոլոր տարբերակները հաշվի առնի:
Ավելին՝ տեսանյութում: