Հայաստանի ֆուտբոլի ֆեդերացիայի նախագահ Ռուբեն Հայրապետյանը երեկ «Ֆուտբոլի ժամը» հաղորդման ժամանակ հայտարարել էր, որ Մարսելի «Օլիմպիկ»-ի հայազգի պաշտպան Գայել Անդոնյանը մարտի 21-ին կժամանի Հայաստան ու կստանա քաղաքացիություն, որից հետո կմիանա մեր ազգային հավաքականին:
Գայել Անդոնյանը ծնվել է Ֆրանսիայի Մարսել քաղաքում՝ 1995թ. փետրվարի 7-ին: 6-ամյա Անդոնյանը 2001թ. ընդունվել է «Գեմենոսիեն» ակումբի ակադեմիա, որտեղ մարզվել է մինչև 2003թ.: 2003-04թթ նա մարզվել է «Աուբանժ»-ում: 2004թ. Գայելը տեղափոխվել է Մարսելի «Օլիմպիկ»-ի ակադեմիա ու սկսել առաջին քայլերը կատարել մեծ ֆուտբոլի ճանապարհին:
2011թ. Անդոնյանը հրավիրվել է Ֆրանսիայի մինչև 16 տարեկանների հավաքական, որտեղ 2 խաղ է անցկացրել: Դեռ վաղուց նա հայտնվել էր Հայաստանի ֆուտբոլի ֆեդերացիայի ներկայացուցիչների ուշադրության կենտրոնում, սակայն 3 տարի առաջ հրաժարվել էր հանդես գալ մեր ազգային թիմում:
«Ինձ հետ կապ էին հաստատել Հայաստանի ֆուտբոլի ֆեդերացիայի ներկայացուցիչները, բայց ես չեմ ընդունել նրանց առաջարկը, քանի որ երիտասարդ եմ ազգային թիմում հանդես գալու համար: Ամեն դեպքում, այդ առաջարկը մեծ պատիվ է ինձ համար», – նշել էր 17-ամյա Անդոնյանը:
2014թ. Անդոնյանն առաջին պաշտոնական խաղն անցկացրեց Մարսելի «Օլիմպիկ»-ի հիմնական թիմի կազմում: Ֆրանսիայի բարձրագույն խմբի առաջնության 12-րդ տուրում «Օլիմպիկ»-ը սեփական հարկի տակ ուժերը չափեց «Լանս»-ի հետ: Թիմը հաղթեց 2:1 հաշվով, իսկ Անդոնյանը փոխարինման դուրս եկավ 79-րդ րոպեին:
20-ամյա կենտրոնական պաշտպանի հասակը 185 սմ է, քաշը՝ 74կգ: Transfermarkt մասնագիտացված ինտերնետ պորտալն Անդոնյանի տրանսֆերային արժեքը գնահատել է 132.000 ֆունտ (180.000 եվրո):