Հարավային Կալիֆոռնիայի համալսարանի Հայկական ուսումնասիրությունների Դորնսայֆ ինստիտուտի անցկացրած «Ստեղծարար Հայաստան» միջոցառման ժամանակ՝ փետրվարի 21-ին, հայ ինժեներների թիմը՝ Վահրամ Մարտիրոսյանի գլխավորությամբ, ներկայացրել է բջջային զանգի հավելված, որը զարմացրել է լսարանին։ Zangi հավելվածը կոչված է բարելավելու հաղորդակցական ծառայությունը։ Skype-ն ու Viber-ը ներկայում ոլորտի առաջատարներն են, սակայն Zangi-ի մշակողները պնդում են, որ ներկայում այն կլինի ավել լավը ու ավելի հարմարավետ, քան առաջատար մրցակիցների ծառայությունն է։
Ցուցանիշները վկայում են հավելվածի արժանիքների հանդեպ օգտատերերի վերաբերմունքի մասին. Zangi-ն իր տեսակի մեջ Հայաստանում թիվ մեկ ներբեռնված հավելվածն է՝ 150 հազար օգտատերերով։ Այն դուրս է մղել Skype-ին, Viber-ին, Tango-ին և մի շարք այլ ծառայությունների։ Հավելվածն արմատներ է գցում նաև արտերկրում։ Այն ԱՄՆ-ում ունի մոտ 1000 օգտատեր՝ հայտնում են ծրագրային մշակողները։
Zangi-ն թույլ է տալիս ձայնային և տեսազանգեր կատարել անվճար՝ համացանցի առկայության դեպքոմ։ Հավելվածն առաջարկում է կիրառման հավելյալ տարբերակներ, դրանով կարելի է ակնթարթային հաղորդագրություններ ուղարկել, կարելի է զանգել, երբ զրուցակիցներից մեկի կապն անջատվել է, կամ կարելի է զանգել, երբ կողմերից մեկը չունի Zangi հավելված, թեև այդ դեպքերում հարկավոր կլինի վճարել։
Մրցակիցների նկատմամբ Zangi-ի առավելություններից մեկն այն է, որ այն ապահովում է մաքուր ձայնային և տեսազանգեր նույնիսկ համացանցային թույլ միացման դեպքում։ Հավելվածը նաև ստեղծված է այնպես, որպեսզի բջջայինից հնարավորինս քիչ ռեսուրս օգտագործի և արդյունքում ունենա բարձր արտադրողականություն նույնիսկ պակաս հզոր հեռախոսների դեպքում։
Մարտիրոսյանը Asbarez-ի հետ զրույցում հայտնել է, որ 5 տարի առաջ շատ հեշտ էր նախագծի համար թիմ հավաքելը, սակայն այսօր՝ ոչ։ Նա նշել է, որ Հայաստանում խնդիր է դարձել «ուղեղների արտահոսքը»։
Մարտիրոսյանի խոսքով՝ Հայաստանում ծրագրային ապահովման ոլորտում մշակումների մեծ կարիք կա, հատկապես բջջային հավելվածների առումով։
«Ես Հայաստանում ՏՏ արդյունաբերությունը համեմատում եմ մարգարտի հետ։ Հենց հիմա կա ավազահատիկ, և մենք կարիք ունենք մշակելու և զարգացնելու այն՝ դարձնելով մեծ մարգարիտ»,- ասել է նա։ «Այն, ինչի կարիքն ունենք Հայաստանում, օգնությունը չէ, այլ ներդրումները։ Մենք օգնության կարիք չունենք։ Մենք ունենք համաշխարհային դասի ինժեներներ և տեխնոլոգիաներ։ Մենք ներդրման կարիք ունենք՝ իմաստալից փոփոխություն բերելու համար»,- ասել է նա։
Մարտիրոսյանը նշել է, որ հայերը մշտապես լսում են հեռավոր սկսնակ ընկերությունների մասին, որոնք մեծ հաջողություններ են ունենում։ Նրա կարծիքով՝ դա Հայաստանում հեռավոր մի բան է թվում, սակայն միֆը պետք է կոտրել, ցույց տալ բոլորին, որ դա հնարավոր է նաև Հայաստանում։
Հավելվածն այժմ հասանելի է Apple App Store և Google Play առցանց խանութներում անվճար ներբեռնման համար։ Այն հասանելի է iOS և Android օպերացիոն հարթակներով աշխատող սարքերի համար։ Մշակողները հայտնել են, որ աշխատանքներ են տանում՝ առաջիկայում թողարկելու Zangi-ի համակարգչային և Mac տարբերակներ։