ԱՄՆ Կոնգրեսի Ներկայացուցիչների պալատի անդամներ՝ հանրապետական Մեք Թորնբերին և դեմոկրատ Ադամ Սմիթը գործընկերների քննարկմանն են ներկայացրել օրինագիծ, որով նախատեսվում է ռազմական օգնություն ցուցաբերել Ուկրաինային, ընդ որում՝ մատակարարել տարբեր զինատեսակներ։ Այս մասին TASS գործակալությանը հայտնել են ամերիկյան օրենսդիր մարմնի ապարատում։
Թորնբերին զինված ուժերի հարցերով Կոնգրեսի ստորին պալատի կոմիտեի նախագահն է, իսկ Սմիթը՝ ավագ դեմոկրատ։ Նրանցից բացի՝ փաստաթղթի տակ իրենց ստորագրություններն են դրել ևս 28 խորհրդարանականներ։
Համաձայն տեքստի՝ ԱՄՆ պաշտպանության նախարարին տրվում է Ուկրաինայի անվտանգության ուժերին և բանակին օգնություն տրամադրելու իրավունք՝ պետքարտուղարի հետ գործողությունների համակարգմամբ։ Օգնությունը ներառում է ուսուցում, տեխնիկա, պաշտպանական նշանակության զենք, նյութատեխնիկական աջակցություն, զինում, սպասարկում։
Պենտագոնի ղեկավարը նման իրավունքով լիազորված կլինի մինչև 2017 թվականի սեպտեմբերի 30-ը։
Հեղինակները նշում են, որ օգնության թվարկված տեսակները պետք է հատկացվեն Կիևին օտարերկրյա ագրեսիայից ինքնիշխանության պաշտպանության համար։ Նախատեսվում է այդ նպատակով հատկացնել 1 մլրդ դոլար։
