Իսրայելի հետ ոչ մի բանակցություն լինել չի կարող, քանի դեռ այն չի հրաժարվել հակապաղեստինական հռետորաբանությունից: Այս մասին գրում է TASS-ը` վկայակոչելով Պաղեստին պետության արտգործնախարար Ռիադ Էլ-Մալիքիին:
«Մենք այժմ Իսրայելի հետ բանակցությունների մեջ չենք գտնվում: Մենք պաղեստինյան ժողովրդի խնդրի արդար լուծում ենք փնտրում: Երբ Իսրայելի ԱԳՆ-ն ասում է, որ Մահմուդ Աբասն ահաբեկիչ է` չնայած որ դիվանագետ է, նման հայտարարությունների պարագայում, իհարկե ոչ մի բանակցություն լինել չի կարող»,- ասել է նա:
«Մենք դիմեցինք ՄԱԿ-ի ԱԽ, որպեսզի մինչև 2017 թվական մեր տարածքից դուրս բերեն իսրայելական զորքերը, իսկ արդյունքում մենք ենթարկվեցինք պատժամիջոցների: Իսրայելը սկսեց անջատել էլեկտրականությունը, դադարեցնել բանկային փոխանցումները: Ինչպես կարելի է երկխոսություն վարել նման պայմաններում»,- մամլո ասուլիսի ժամանակ շարունակել է Էլ-Մալիքին:
Նա նաև ասել է, որ Պաղեստինն Իսրայելի կառավարությունում գործընկերներ չի նկատել, որոնց հետ կարելի կլիներ բանակցություններ վարել:
Էլ-Մալիքիի խոսքերով` այն, որ Իսրայելը չի ցանկանում խաղաղության ուղով ընթանալ, ապացուցում է նաև վերջինիս վարած վերաբնակեցման քաղաքականությունը: