Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ շարունակվեց Արթուր Շահինյանի գործի դատական քննությունը:
25-ամյա Արթուր Շահինյանը մեղադրվում է այն բանի համար, որ 2013 թվականի հուլիսի 13-ին, առավոտյան ժամը 6-ն անց 30-ի սահմաններում ինքնությունը չպարզված անձի կամ անձանց հետ բաց դռնից մուտք է գործել 75-ամյա Անյա Մուսայելյանի տուն և շահադիտական դրդումներով սպանել է նրան:
Ըստ գործի տվյալների՝ Արթուրն ու տուժող կինը նույն թաղամասում են բնակվել՝ Երևանի Էմինեսկուի 2-րդ փողոցում, Արթուրը ճանաչել է տուժողի որդուն, թոռներին: Տղաների հետ ֆուտբոլ է խաղացել…
Դեպքի ժամանակահատվածում տուժող կինը տանը մենակ է եղել, որդին ու թոռները մեկնել էին հանգստանալու: Ամբաստանյալն իմացել է այդ մասին:
Տուժողը խեղդամահ է արվել, նրա տնից գողացվել է 2700 դոլար գումար և ոսկեղեն:
Դեպքից անմիջապես հետո Արթուր Շահինյանը մեքենա է գնել: Ընկերներից մեկի հետ ոսկեղեն է գրավադրել: Գրավադրված ոսկե մատանին եղել է տուժողի մատանին, որ հափշտակվել էր սպանությունից հետո:
Արթուր Շահինյանը հայտնաբերվել ու բերման է ենթարկվել Ախթալա քաղաքից 2013 թվականի օգոստոսի 8-ին:
Ինչպես ասաց մեղադրողը՝ նախաքննության սկզբում Արթուր Շահինյանը տվել է խոստովանական երկու ցուցմունք, մասնակցել է քննչական փորձարարությանը և տուժողի տանը ցույց է տվել, թե ինչպես է կատարել հանցագործությունը: Նա չի ասել միայն, թե ով է եղել իր հետ, ասել է, թե մենակ է եղել:
Արթուր Շահինյանը մեղադրվում է շահադիտական դրդումներով սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ, 8-րդ կետերով:
Այն բանից հետո, երբ ստացվել է սպանված կնոջ եղունգների տակ հայտնաբերված արյան ԴՆԹ-ի հետազոտության եզրակացությունը, համաձայն որի՝ դա ո՛չ սպանվածի, ո՛չ էլ Արթուր Շահինյանի արյան ԴՆԹ-ին չի համապատասխանել, Արթուր Շահինյանը հրաժարվել է խոստովանական ցուցմունքներից ու հայտարարել է, թե ինքը տուժողի սպանության հետ ոչ մի առնչություն չունի:
Նախորդ նիստերից մեկի ժամանակ ամբաստանյալը հայտարարել էր. «Ես մի տարի ա բերդում եմ: Ես ինձ լրիվ անմեղ եմ ճանաչում, էս հանցագործությունը ես չեմ կատարել ու մի տարի ա փակված եմ…»:
Դատարանը հարցաքննել է գործով տուժողի իրավահաջորդին և վկաներին: Մնացել են երկու վկաներին, ում բերման ենթարկելու մասին դատարանի կայացրած որոշումները դեռ մնում են չկատարված:
Մասնավորապես՝ վկա Վահեի վերաբերյալ պատասխան էր ստացվել նախորդ նիստին, թե վկային հնարավոր չէ բերման ենթարկել, որովհետև նա Գեղարքունիքի մարզում է:
Նախագահողն այսօր տարակուսեց. «Մարտունին հո Նյու Յորքը չի՞, որ հնարավոր չլինի այնտեղից վկային բերման ենթարկել Երևան»:
Վկան գործի համար կարևոր է այն առումով, որ Արթուր Շահինյանն ու այս վկան միասին են գնացել գրավատուն, վկայի անունով է գրավադրվել տուժողի մատանին:
Արթուր Շահինյանի և նրա ընկեր Վահեի այցելությունը գրավատուն տեսանկարահանվել է գրավատան տեսախցիկի կողմից, այդ տեսանկարահանման նյութերով կրիչը կցված է քրեական գործին:
Դատարանում հարցաքննվեց Ա. Մուսայելյանի դիակի դատաբժշկական փորձաքննությունը կատարած փորձագետ Ի. Մելքոնյանը:
Իր տված եզրակացության շուրջ փորձագետը հայտնեց, որ տուժողը մահացել է մեխանիկական շնչահեղձությունից՝ պարանոցի օրգանների սեղմման արդյունքում:
Դիակի վրա հայտնաբերվել են նաև այլ վնասվածքներ՝ քերծվածքներ, արյունազեղումներ՝ պատճառված բութ առարկայով, կտրած վերքեր աջ դաստակի 2-րդ, 3-րդ և 4-րդ մատների շրջաններում՝ պատճառված սուր կտրող գործիքով, օրինակ՝ դանակով: Արյունազեղումներ են հայտնաբերվել նաև տուժողի գլխի մաշկի տակ: Այդ արյունազեղումները կարող էին առաջանալ ինչպես ձեռքով հարվածելուց, այնպես էլ գլուխը, օրինակ, պատին խփելուց: Բայց բոլոր վերոհիշյալ վնասվածքները տուժողի մահվան հետ անմիջական կապի մեջ չեն, դրանք թեթև վնասվածքներ են եղել: Բոլոր վնասվածքները պատճառվել են կարճ ժամանակաընթացքում, տուժողի կենդանության օրոք, վնասվածքները հասցնելու հերթականությունը որոշել հնարավոր չի եղել:
Դատարանը հետազոտեց գործում առկա այլ ապացույցները և փաստաթղթերը:
Մեղադրողը հրապարակեց դատաքիմիական, դատակենսաբանական փորձաքննությունների եզրակացությունների հետևությունները: Տուժողի եղունգների տակ հայտնաբերված արյան փորձաքննությամբ պարզվել է, որ այդ արյան ԴՆԹ-ն ո՛չ տուժողինն է, ո՛չ Արթուր Շահինյանինը, ավելին, այն… կնոջ ԴՆԹ է:
Այս հրապարակումից հետո ամբաստանյալի շահերի պաշտպան, փաստաբան Քամալյանը հանդես եկավ հայտարարությամբ. «Այս ապացույցը ցույց է տալիս, որ պաշտպանյալս ոչ մի առնչություն չունի սպանության հետ»:
Մեղադրողն էլ ասաց, թե հետազոտված ապացույցը հիմնավորում է, որ Շահինյանը սպանությունը կատարել է խմբի կազմում, նրա հետ այլ մարդ կամ մարդիկ են եղել:
Մեղադրող Կարապետյանը տուժողի իրավահաջորդի ներկայացուցչի հարցին պատասխանեց, որ տուժողի եղունգների տակ հայտնաբերված արյունը և այլ մասնիկները բազմաթիվ անգամ են ենթարկվել փորձաքննության, նոր փորձաքննություն նշանակելն արդեն անիմաստ է: Ամբաստանյալի արյան, ԴՆԹ-ի նմուշ չի հայտնաբերվել…
Ըստ գործում առկա փաստաթղթի՝ գրավատանը հայտնաբերված մատանին, որ տուժող կողմը ճանաչել է որպես սպանված կնոջ մատանի, արժե 110 հազար դրամ:
Գործում առկա փաստաթղթի համաձայն՝ ամբաստանյալ Արթուր Շահինյանի բջջային հեռախոսը հանցագործության կատարման պահին սպասարկվել է տուժողի տանը մերձակա ալեհավաքի կողմից, իսկ հանցագործությունից հետո՝ Մալաթիա-Սեբաստիա վարչական տարածքում գտնվող ալեհավաքի կողմից:
Մեղադրողն ասաց, որ դա համընկնում է ամբաստանյալի տված խոստովանական ցուցմունքների հանգամանքներին:
Բերման ենթարկված Արթուր Շահինյանի դաստակին ու մարմնին, ըստ համապատասխան արձանագրության, հայտնաբերվել են քերծվածքներ:
Արթուրը հայտնել է, թե դաստակի քերծվածքները պատճառել է սպանված Մուսայելյանը՝ հանցագործության կատարման պահին, իսկ մարմնի քերծվածքը ստացել է հանցագործության վայրից հեռանալու ժամանակ՝ դեպի ձոր տանող նեղ արահետով անցնելիս:
Ամբաստանյալի շահերի պաշտպանը հիշեցրեց, որ փորձագիտական եզրակացությամբ հաստատվել է, որ տուժողի եղունգների տակ Արթուր Շահինյանի ԴՆԹ-ի նմուշ չկա:
Մեղադրողը ներկայացրեց քննչական փորձարարություն կատարելու վերաբերյալ արձանագրությունը, համաձայն որի՝ Արթուր Շահինյանը ցույց է տվել, թե ինչպես է պատշգամբից մուտք գործել տուժողի տուն, շրջել սենյակներում, որտեղից է հայտնաբերել ոսկեղենը, ինչպես է խեղդելու եղանակով սպանել Ա. Մուսայելյանին, ինչ ճանապարհով է հեռացել:
Քննչական փորձարարության կատարման ամբողջ ընթացքը տեսանկարահանվել է, կրիչը կցված է քրեական գործին:
Հետազոտվեց նաև դեպքի վայրի զննության արձանագրությունը:
Սպանված կնոջ մարմինը հայտնաբերվել է տան միջանցքում, նրա ծոծրակի հատվածում եղել է արյունոտ սրբիչ, որի մասին իր խոստովանական ցուցմունքում նշել էր Արթուր Շահինյանը: Սենյակներում իրերը խառնված են եղել:
Ամբաստանյալ Արթուր Շահինյանն ասաց, որ ցանկանում է դատարանում ցուցմունք տալ, բայց ժամանակ խնդրեց՝ ցուցմունքին նախապատրաստվելու համար:
Դատական հաջորդ նիստին՝ մարտի 26-ին, ցուցմունք կտա ամբաստանյալը:
Միգուցե դատարան ներկայացվեն նաև երկու վկաները, ում վերաբերյալ դատարանը դարձյալ բերման որոշումներ կայացրեց: Նրանք ևս կհարցաքննվեն, հակառակ դեպքում կհրապարակվեն նրանց նախաքննական ցուցմունքները: