Երեկ խորհրդարանում խոսելով իր գլխավորությամբ հակակոռուպցիոն նոր խորհրդի ստեղծումից և կոռուպցիայի դեմ պայքարից` վարչապետ Հովիկ Աբրահամյանն ասել է, թե ինքն ապրիլից վարչապետ է և այդ ընթացքում մեկը չի կարող ասել, որ ինքը սերտաճել է որևէ բիզնեսի հետ: Այս հայտարարությունը հնչել է ոչ թե ինչ-որ տեղ հումորի և երգիծանքի ժամին, այլ պառլամենտում ԱԺ-կառավարություն հարցուպատասխանի ընթացքում: Սակայն հնչածը դրանից պակաս ծիծաղելի, իհարկե, չի դառնում:
Եվ խնդիրն այն չէ, որ վարչապետության ընթացքում Հովիկ Աբրահամյանը բիզնեսի հետ է սերտաճել: Գուցե և չի սերտաճել, սակայն այն պարզ պատճառով, որ բարձրաստիճան պաշտոնյաները Հայաստանում արդեն շատ տարիներ առաջ են այնպես և այնքան սերտաճել բիզնեսի հետ, որ այսօր պարզապես այլևս սերտաճելու բիզնես էլ չկա: Առավել ևս, որ Հովիկ Աբրահամյանի վարչապետության շրջանում տնտեսական վիճակը, բիզնեսի վիճակը այնպիսին է, որ նույնիսկ թշնամուդ չես ցանկանա սերտաճել այդ վիճակում գտնվող բիզնեսի հետ:
Եվ այս ամենով հանդերձ, այնուամենայնիվ հետաքրքրական է հարցը, թե ինչ էր անում Հովիկ Աբրահամյանը մինչև ապրիլյան քրեաօլիգարխիկ ներիշխանական հեղաշրջումը, որի արդյունքում դարձավ վարչապետ: Ինչ էր անում կամ ավելի կոնկրետ` ինչ բիզնեսների հետ է նա սերտաճել մինչև այդ: Ըստ որում` խոսքը անձնապես նրա մասին չէ միայն, այլ Աբրահամյանների ընտանիքի, որի անդամները մի շարք ոլորտներում ունեն խոշոր բիզնես հետաքրքրություններ:
Հայաստանի բարձրաստիճան պաշտոնյաների նման հայտարարություններն արդեն իսկ լավագույն պատասխանն են այն հարցի, թե ինչպես է նորաստեղծ խորհուրդը պայքարելու կոռուպցիայի դեմ: Ոչ մի կերպ, որովհետև իշխանությունների համար դա հավասարազոր է ինքնասպանության: Հայաստանում նման խորհուրդներ կամ կառույցներ կազմավորում են ոչ պայքարի, այսինքն` ոչ ինքնասպանության համար. քաղաքականության մեջ գոնե նման քայլերի չգնալու խելքը հայաստանյան իշխանություններին բավարարում է:
Հայաստանում նմանօրինակ կառույցների ձևավորումն ու գործունեությունն ունի մեկ նպատակ՝ փնտրել կոռուպցիայի այսպես ասած անվտանգ փաթեթավորման տարբերակներ, կամ այլ կերպ ասած` կատարելագործել կոռուպցիայի փաստաբանական ինստիտուտը: Իսկ դրա համար հարկավոր է չափազանց լավ իմանալ «հաճախորդին»՝ տվյալ դեպքում կոռուպցիային, նրան սպառնացող նոր մարտահրավերները, որպեսզի լավագույնս կառուցվի պաշտպանությունը: Եվ` ինչպես կարելի է առավելագույնս լավ իմանալ, այսպես ասած ձեռքը պահել կոռուպցիոն զարկերակի վրա: Դե, իհարկե, դրանով զբաղվող կառույցի միջոցով, որը կբացահայտի կոռուպցիայի խոցելի կողմերն ու կնպաստի այդ կողմերը պաշտպանելու քայլերի մշակմանը:
Լուսանկարը` Irakan.info-ի