Ապրիլի 8-ին Կիև է մեկնում Հայաստանի արտգործնախարար Էդվարդ Նալբանդյանը, ով այնտեղ կմասնակցի ԱՊՀ արտգործնախարարների խորհրդի նիստին: Սակայն Նալբանդյանի կիևյան այցելության բուն թեման իհարկե ամենայն հավանականությամբ կլինի բոլորովին այլ խնդիր, որը առնչություն ունի ոչ թե ԱՊՀ, այլ պատգամավոր Սամվել Ալեքսանյանի գործերի հետ: Խոսքը վերաբերում է օղիների արտադրությանը, որը կարող է դառնալ արդեն միջազգային աղմուկի պատճառ:
Բանն այն է, որ Սամվել Ալեքսանյանին պատկանող ընկերությունն արտադրում է օղիներ, որոնք շատ նման են Հայաստան ներկրվող ուկրաինական արտադրության օղիների` շփոթության աստիճանի նման, ինչը որպես փաստ արձանագրել ու Ալեքսանյանին տուգանել էր նաև Հայաստանի տնտեսական մրցակցության պաշտպանության հանձնաժողովը:ն Բայց Ալեքսանյանը դատական կարգով բողոքարկում է հանձնաժողովի որոշումը, ու շարունակում օղիների շփոթության աստիճանի նման արտադրությունը: Իսկ ուկրաինական կողմն էլ շարունակում է բողոքել, ինչպես երևում է` առայժմ ապարդյուն: Բանը հասավ այնտեղ, որ օրերս տեղեկություն է տարածվել հարցը Առևտրի համաշխարհային կազմակերպությանը շրջանակում բարձրացնելու Ուկրաինայի մտադրության մասին, եթե Սամվել Ալեքսանյանի օղիների հարցը չլուծվի:
Այդպիսով ակնհայտ է, որ արտգործնախարար Նալբանդյանին Կիևում թերևս տհաճ խոսակցություն է սպասվում այդ թեմայով: Ակնհայտ է նաև, որ այդ հարցը լուծողը ամենևին էլ Նալբանդյանը չէ, այլ Սերժ Սարգսյանը, ում մերձավոր շրջանակի օլիգարխ է դարձել Սամվել Ալեքսանյանը: Հետևաբար հետաքրքիր է, թե ինչ հանձնարարությամբ է Նալբանդյանը մեկնել Ուկրաինա և ինչպես է փորձելու մեղմել ուկրաինական կողմի դժգոհությունը:
Այդ ամենի մեջ հատկանշականն այն է, թե Հայաստանը որպես պետություն ինչ կախվաության մեջ է հայտնվել օլիգարխիայից, կարող է անգամ հայտնվել միջազգային սկանդալի վտանգի առաջ, բայց չի կարող սաստել կամ դադարեցնել մի օլիգարխի մեծ խնդրահարույց և փաստացի ապօրինի գործունեությունը, ինչը հաստատված է հենց ՏՄՊՊ հանձնաժողովի որոշմամբ և տուգանքով: Առկա երևույթը փաստացի շատ հստակ կերպով հաստատում է այն փաստը, որ Հայաստանում օլիգարխներն են այսօր իշխանություն և պետական բարձրաստիճան պաշտոնները նրանց շահն են սպասարկում, անգամ պետության միջազգային հեղինակության գնով: Հետաքրքիր է, իսկ Նալբանդյանը հետը Կիև հայկական կոնյակներ տանելու՞ է հարցը լուծելու համար:
Չէ՞ որ ինչպես Հովիկ Աբրահամյանի ԵԽԽՎ կատարած պատմական այցելությունից պարզվեց, կոնյակները Հայաստանի բարձրաստիճան պաշտոնյաների այցերի բաղկացուցիչ մասն են, հայկական դիվանագիտության առանցքը: Եթե այո, ապա Էդվարդ Նալբանդյանին թերևս պետք է ուշադիր լինել, հանկարծ այդ տարածը «շփոթության աստիճանի նման» կոնյակներ չլինեն: Այդ դեպքում աչքը շինելու փոխարեն, Նալբանդյանը ունքն էլ կհանի: