ՀՅԴ Բյուրոյի անդամ Վահան Հովհաննիսյանը երեկ հայտարարել է, որ իրենց համար անընդունելի է ընդդիմության միավորման այն տարբերակը, որն առաջարկում է Հայ ազգային կոնգրեսը: Բայց Վահան Հովհաննիսյանը ասել է նաև, որ ընդդիմության միավորում, այնուամենայնիվ, տեղի կունենա: «Անպայման միասնություն տեղի կունենա, բայց մենք կորոշենք, թե ում հետ և ոնց, այլ ոչ թե նրանց թելադրանքով», հայտարարել է Վահան Հովհաննիսյանը` նկատի ունենալով Կոնգրեսին:
Այդպիսով, ՀՅԴ Բյուրոյի անդամը փաստացի հաստատել է այն տեղեկությունները, որ մի քանի կուսակցություններ կարող են ընդդիմադիր նոր միավորում կազմել: Ընդ որում` հատկանշական է, որ Վահան Հովհաննիսյանն օգտագործում է «անպայման» բառը, ինչը թերևս նշանակում է, որ միավորման հարցը արդեն իսկ լուծված է: Հետևաբար այժմ հարցն այն է, թե այդ միավորման մեջ ովքե՞ր են մտնելու, այսինքն` ի՞նչ կուսակցություններ և գործիչներ:
«Ժառանգությունը», լինելո՞ւ է արդյոք Տիգրան Կարապետյանը, լինելո՞ւ է արդյոք Արամ Կարապետյանը, էլ ո՞վ է լինելու, թե՞ ՀՅԴ խորհրդարանական խմբակցության ղեկավար Վահան Հովհաննիսյանն այլ սուբյեկտներ նկատի ունի: Իսկ ի՞նչ դեր է ունենալու այդ նոր միավորումը երկրորդ նախագահ Ռոբերտ Քոչարյանի կյանքում, և ի՞նչ դեր է ունենալու այդ նոր միավորման կյանքում Քոչարյանը: Ավելին` առավել ուշագրավ կարող է լինել թերևս հարցը, թե արդյոք նոր միավորումը տեղյակ լինելո՞ւ է իր կյանքում Ռոբերտ Քոչարյանի դերի մասին, թե՞ պարզապես ստեղծվում է` ինքն էլ չիմանալով ինչի կամ ում համար:
Բայց թերևս լավ կլինի, որ այդ միավորմանը գնացող սուբյեկտներն արդեն այժմվանից մտածեն այդ ամենի մասին, եթե մինչ այժմ իհարկե չեն մտածել:
Այլապես այդ միավորումն ընդամենը կատարելու է այն ձեռքի դերը, որով մեկ այլ սուբյեկտ կրակից շագանակներ կփորձի հանել իր համար: Տվյալ դեպքում այդ սուբյեկտը կարող է լինել հենց Ռոբերտ Քոչարյանը: Իհարկե, դատելով թե՛ ներքաղաքական, թե՛ աշխարհաքաղաքական գործընթացներից` Քոչարյանին այդ շագանակը հանել, համենայնդեպս մոտ ապագայում, հազիվ թե հաջողվի, նույնիսկ ուրիշի ձեռքով, բայց այրել այդ ուրիշի ձեռքը` նա հաստատ կարող է: Հետևաբար մեր բարձրացրած հարցերը կենսական են հենց այդ ուրիշների համար, կամ այդ ուրիշը լինելու վտանգի առաջ կանգնած սուբյեկտների համար` կենսական թե քաղաքական, թե զուտ մարդասիրական տեսանկյունից: