Հետազոտության արդյունքում անսպասելիորեն պարզվել է, թե երբ են կանայք ծննդաբերությունից հետո ամենաշատ սթրեսն ապրում: Այս մասին հայտնում է direct-press.ru-ն:
Ընկճախտն ավելի հաճախ հանդիպում է 4-ամյա երեխաների մայրիկների շրջանում, քան մինչև 1 տարեկան փոքրիկների մայրիկների դեպքում, պարզել են հետազոտողները:
Բժիշկները վերլուծել են Ավստրալիայի Մելբուռն քաղաքի 6 հիվանդանոցներում ծննդաբերած 1507 մայրերի տվյալներ, որոնք հարցաթերթիկներ են լրացրել, երբ նրանց երեխաները եղել են 3, 6, 12, 18 ամսական և 4 տարեկան:
Ծննդաբերությունից 4 տարի հետո ընկճախտի տարածվածությունը կազմել է 14,5%՝ ավելին, քան մայրության առաջին տարվա ցանկացած հատվածում: Ընդ որում՝ 1 երեխա ունեցող կանայք ընկճախտի զգալիորեն ավելի բարձր մակարդակ են ունեցել, քան 2 և ավելի երեխաներ ունեցող մայրերը:
Ռիսկի այլ գործոններ են առաջին ծննդաբերությունը, երիտասարդությունը (18-24 տարեկան), կյանքի սթրեսային դեպքերը, բռնությունը զուգընկերոջ կողմից կամ ցածր եկամուտը:
Ըստ հետազոտողների՝ նշված արդյունքները շատ անսպասելի են, որովհետև բժիշկները կանանց հոգեբանական առողջության վրա ուշադրությունը կենտրոնացնում են միայն հղիության շրջանում և երեխաների ծննդից հետո առաջին տարում: