Հիմնադիր խորհրդարանի ավտոերթի դեմ գրոհի հրամանը Բաղրամյան 26-ից է եղել: Այս մասին մեզ հետ զրույցում նշեց Հիմնադիր խորհրդարանի ներկայացուցիչ Ժիրայր Սեֆիլյանի կինը` Նանոր Սեֆիլյանը, որը նույնպես իր երեխաների հետ ներկա է եղել տեղի ունեցածին:
Նրա խոսքով` Ժիրայր Սեֆիլյանը մարմնական վտասվածքներ է ստացել, հիմնականում աչքի շուրջ: «Ժիրայրը երեկ իրեն մի պահ վատ զգաց, տարանք Վայոց ձորի հիվանդանոց, պարզվեց՝ ներքին արյունահոսություն չկար, ամեն ինչ լավ էր: Հիմա համեմատաբար լավ է, 2-3 օրից ավելի լավ կլինի»,- ասաց նա:
Անդրադառնալով տեղի ունեցածին՝ Նանոր Սեֆիլյանը պատմեց հետևյալը. «Նախ ասեմ, որ մենք ուզում էինք ընդամենը խաղաղ երթով, ինչպես Հայաստանի մյուս բոլոր շրջաններն ենք գնացել, հանգիստ մեկնենք Արցախ՝ որպես Հայաստանի մի անբաժան մաս: Այնտեղ էլ կազմակերպենք մեր ավտոերթը, հանդիպենք ուսանողների հետ, նրանց տեղեկացնենք Հիմնադիր խորհրդարանի նպատակի, գաղափարների մասին: Այդ նպատակով ուզում էինք շաբաթ-կիրակի գնալ Արցախ:
Արդեն բոլորին է հայտնի, որ երբ հասանք Արցախի սահմանին, այն փակ էր, ոստիկանները չթողեցին, որ մտնենք Արցախ: Ոստիկանությունն ասաց, որ ձեզ չենք թույլատրելու: Մինչ այդ մենք որոշ տեղեկություններ ունեինք, որ հնարավոր է խափանեն մեր այցը, որովհետև շատերը Ֆեյսբուքում գրում էին՝ «մի՛ եկեք» և այլն: Մենք ամեն դեպքում ուզում էինք լավ բան անել: Մենք մեր ընտանիքով էինք, մյուս մարդիկ` իրենց ընտանիքներով, երեխաներով: Մեզ թույլ չտվեցին մտնել Արցախ:
Ի զարմանս բոլորիս, այնտեղ դիպուկահարներ էին կանգնած, սպեցնազն էր կանգնած դիմակներով: Շատ զարմացած էինք, որ մենք խաղաղ ավտոերթի էինք գնացել, ու իրենք մեզ այդկերպ ընդունեցին:
Երբ ուզեցինք շրջվել ու վերադառնալ, այդ պահին գրոհն սկսվեց: սպեցնազի մարդիկ էին և մի քանի հարբած, քաղաքացիական հագուստով մարդիկ, որոնք հավանաբար ոստիկաններ էին: Սկսեցին աջ ու ձախ, անխնա խփել` առանց նայելու կին, երեխա:
Մենք ոչինչ չենք ասել: Արդեն փակ էր ճանապարհը, մեքենա էր կանգնած: Իջան Ժիրայր Սեֆիլյանը, Պավլիկ Մանուկյանը, Իգոր Մուրադյանը, Էմիլ Աբրահամյանը (վերջին երկուսը հադութցի են), որ խոսեն: Տեսանք, որ օգուտ չունի խոսելը, որովհետև կտրականապես մերժում են, նստեցինք մեքենաները, որ վերադառնանք Հայաստան, ու էդ պահին գրոհն սկսվեց: Վազելով, գոռալով՝ սպեցնազի տղերքը մահակներով հարձակվեցին բոլոր մեքենաների վրա: Մեքենաների ապակիները ջարդեցին, դռները ջարդեցին, մեքենաներից մարդկանց քաշելով դուրս հանեցին, ծեծեցին, վիրավորեցին:
Գրոհն սկսվեց լրագրողին գետնին տապալելով ու մինչև արյունլվիկ ծեծելով: Դրանից հետո անցան մեզ»:
Հարցին, թե, իր կարծիքով՝ ովքեր են կանգնած այս ամենի հետևում, Նանոր Սեֆիլյանը պատասխանեց. «Դե, պարզ էր, որ ԼՂՀ իշխանությունը չէր ուզում, որ մենք գնանք, Հիմնադիր խորհրդարանի քարոզչությունն անենք, բայց ես վստահ եմ, որ հրամանը Երևանից է եկել` Բաղրամյան 26-ից, որի նպատակն այն էր, որ Արցախում այդ քարոզչությունը չլինի ամեն գնով»:
Ավելին` տեսանյութում:
