Հունվարի 29-ին Կիեւյան կամրջից ցած նետված եւ հրաշքով կենդանի մնացած 15-ամյա աղջկա վիճակը, թեեւ բժիշկների գնահատմամբ մնում է կայուն ծանր, բայց նրա կյանքին վտանգ չի սպառնում: Այս մասին Armtimes.com-ին հայտնել են «Արմենիա» հանրապետական բժշկական կենտրոնից:
«Աղջիկը իսկապես մեծ հրաշքով է փրկվել, անհավանական մի բան էր, մենք բժիշկներս էլ մինչեւ հիմա ապշած ենք»,- Armtimes.com-ի հետ զրույցում ասել է «Արմենիա» հանրապետական բժշկական կենտրոնի անզգայացման եւ վերակենդանացման բաժանմունքի ղեկավար, դոցենտ Արա Ղազարյանը:
Բժշկի փոխանցմամբ, աղջիկը հիվանդանոց է տեղափոխվել տրավմատիկ շոկ ախտորոշմամբ, գիտակցության բոլոր նշանները առկա են եղել, ուստի անմիջապես իրականացվել է հակաշոկային թերապիա: Լիարժեք հետազոտությունից հետո հայտնաբերվել է թոքերի եւ կրծքավանդակի սալջարդ, չի ունեցել գլխուղեղի սալջարդ, եւ միակ կոտրվածքը աջ կողի կոտրվածքն է եղել:
Ավելի ուշ՝ բժիշկները ներքին արնահոսության մասին կասկածները հերքելու նպատակով իրականցրել են լապարատոմիա (որովայնահատում), եւ պարզվել է, որ ներքին արնահոսություն չկա: Արդեն դեպքի հաջորդ օրը առավոտյան աղջկա առողջական վիճակը ավելի է կայունացել, եւ բժիշկները կարողացել են հեռացնել արհեստական շնչառություն ապահովող սարքը: Այնուամենայնիվ, բժիշկը հիվանդի վիճակը գնահատեց կայուն ծանր: Փորձեցինք ճշտել՝ կայուն ծանր ասելով՝ ի՞նչ նկատի ունի, կյանքին վտանգ սպառնո՞ւմ է: Ի պատասխան մեր հարցի՝ բժիշկն ասաց, որ երբ կենսական նշանակություն ունեցող օրգանները վնասվում են՝ հիվանդի վիճակը գնահատվում է այդպիսին, իսկ տվյալ դեպքում աղջկա մոտ նկատվել էր թոքերի սալջարդ: Բժիշկն ասաց, որ աղջիկը մինչ երկուշաբթի կմնա վերակենդանացման բաժանմունքում՝ բժիշկների հսկողության տակ: Բայց նրա կյանքին վտանգ չի սպառնում:
Մանրամասները՝ սկզբնաղբյուր կայքում