Գյումրիում հունվարի 12-ին տեղի ունեցած դաժան սպանության և դրան հաջորդած զարգացումների, մասնավորապես սպանության մեջ մեղադրվող ՌԴ ռազմաբազայի զինծառայող Վալերի Պերմյակովի հարցաքննության մասին հրապարակված կցկտուր տեղեկությունները նորություն չեն պարունակում, ավելին, բազմաթիվ նոր հարցեր են առաջացնում: Այս կարծիքին է ՀՀ փաստաբանների պալատի անդամ, փաստաբան Ալեքսանդր Սիրունյանը:
Վերջինս ԳԱԼԱ-ի լրագրողի հետ զրույցում նշել է հետևյալը. «Կասկածների մեջ եմ հայտնվել, և մի շարք հարցեր են մոտս առաջանում: Ուզում եմ հասկանալ՝ այդ ՌԴ հրամանատարությունն իրո՞ք այդ բարքերն է սահմանել զորամասում, որ իրենց զինվորը կարողանում է ամեն ինչ անել: Կամ, ինքն էր ասել այդպես, երբ հարցրել էին, թե ինչու ես դուրս եկել, ասել էր՝ «я вышел пошалить», բա «պաշալիտ» անողը ավտոմատո՞վ է դուրս գալիս: «Պաշալիտ» անողը դուրս կգար՝ մտածելով, որ բռնվելու դեպքում մի երեք օր գաուբախտ է նստելու»:
Ալեքսանդր Սիրունյանի խոսքով՝ եթե սպանությունը միայն Պերմյակովն է կատարել, ապա կասկածներն ավելի են շատանում: «Քսանութ հատ առանձին կրակոցներ են հնչել, այսինքն դա տևել է ոչ թե երկու վայրկյան, քսանութ կրակոց, այսինքն այդ փոքր տեղում, այն էլ պատուհանի ապակին ջարդած էր, ոչ մեկը չլսե՞ց: Քսանութ դխկ-դխկ անում է, հետո հանվում, շորերը դասավորում, հագնվում, և հետո պարզվում, որ իրա հագով էլ շոր կա, կոշիկ կա»,- հարցադրում է անում փաստաբանը:
Նա իր ցավակցությունն է հայտնում Ավետիսյանների հարազատներին և նշում, թե հատկապես փոքրիկ Սերյոժայի մահը ինչպես բոլորը, այնպես էլ ինքը շատ ծանր է տարել: «Բայց այդ հարցերի պատասխանը պետք է տրվի»,- ասում է Ա.Սիրունյանը:
ԳԱԼԱ-ի հարցին, թե ինչպե՞ս ստանալ այդ հարցերի պատասխանը, երբ հայկական կողմն, ըստ ՀՀ քննչական կոմիտեի, ներգրավված է գործում, բայց տեղեկատվություն տրամադրելու հարցում բավականին «ժլատ է», իսկ ռուսական կողմն ընդհանրապես լռում է, փաստաբանն ասաց հետևյալը. «Նախ ի՞նչ է նշանակում մեկն իրականացնում է, մյուսը ներգրավված է: Բայց միասին չի լինում, որովհետև, կարող եք հիշել, Պերմյակովը մի քանի տարի հետո դիմելու է Եվրադատարան ու ասի, որ նախաքննությունն իրականացվել է սխալ մարմնի կողմից, իսկ ինձ դատել է ապօրինի դատարանը, տվյալ դեպքում ՌԴ դատարանը, ինձ պետք է դատեր հայկական դատարանը, ու դա կլինի բոմբ»:
Ա.Սիրունյանն ասում է՝ միջպետական պայմանագրերով քննչական խմբեր չեն ստեղծվում, համատիրությո՞ւն է, ի՞նչ է, հարցադրում է անում փաստաբանը: Նա նշում է՝ լինում է քննիչ և քննչական խումբ: «Ապօրինի տարած հանցագործ է, որին իրենք քննում են և ասում են՝ հայկական կողմ արի մասնակցի: Հիմա խախտելով անմեղության կանխավարկածն ասենք, այո Պերմյակովն է, ով մտել է կրակել է, ոչ մեկը չի լսել, բայց հետո ասելու է, որ իրեն սխալ դատարան է դատել»,- ասաց փաստաբանը:
Մանրամասները՝ ԳԱԼԱ-ում
