Moody’s միջազգային վարկանիշային գործակալությունն իջեցրել է Հայաստանի կառավարության պարտատոմսերի վարկանիշը՝ «Ba2»-ից դարձնելով «Ba3»: Փոխվել է նաև կանխատեսումը՝ նախկին «կայունի» փոխարեն դարձնելով «բացասական»:
Կառավարության ֆինանսատնտեսագիտական վարչության պետ Մակար Ղամբարյանն «Առաջին լրատվական»-ի հետ զրույցում այս վարկանիշի ազդեցությունը տնտեսության վրա հստակ չգնահատեց, քանի որ իրավիճակը և այս գնահատականները պարբերաբար կարող են փոխվել:
Նրա խոսքով՝ երկրի տնտեսության ակտիվությունը պայմանավորված է մի քանի գործոններով, միայն օտարերկրյա ներդրումները քիչ են իրավիճակի գնահատման համար, պետք է հաշվի առնել նաև ՀՆԱ աճը և այլ գործոններ:
«Կառավարության քայլերն ուղղված են Moody’s-ի վարկանիշում մեր դիրքերի բարելավմանը, սակայն պետք է հաշվի առնել, որ մեր պարտատոմսերի վարկանիշի անկումը պայմանավորված չէ մեր տնտեսության վիճակով. այստեղ մեծ դեր խաղացին արտաքին գործոնները, մասնավորապես՝ Ռուսաստան, ԱՊՀ և այլն»,- հայտնեց Ղամբարյանը:
Էկոնոմիկայի նախարարությունից «Առաջին լրատվական»-ին տեղեկացրին, որ պարտատոմսերի վարկանիշի անկումը ազդեցություն կունենա ներդրումային դաշտի ակտիվության վրա, սակայն այս պահին դեռևս վերլուծություններ չկան, թե ինչ մասշտաբների մասին է խոսքը:
Հիշեցնենք, որ այս վարկանիշի վրա հիմնականում ազդեցություն է ունեցել Հայաստանի արտաքին խոցելիությունը, որը պայմանավորված է Ռուսաստանից դրամական փոխանցումների կրճատումներով, փոխարժեքի անկայունությամբ և գերզգայունությամբ, արտարժույթի պահուստների վրա սպասվող ճնշմամբ: Պարտատոմսերի վարկանիշն իջել է նաև այն պատճառով, որ երկրում ներդրումային ակտիվություն չկա, և ԵՏՄ-ից դուրս գտնվող երկրների հետ առևտրի հնարավոր սահմանափակումների ռիսկ կա:
