ԵԽԽՎ-ում Ռուսաստանին ձայնից զրկելու բանաձևին հայաստանյան պատվիրակության մի քանի անդամների ձեռնպահ քվեարկելը Գլոբալիզացիայի և տարածաշրջանային համագործակցության կենտրոնի տնօրեն Ստեփան Գրիգորյանի կարծիքով մեկ պատճառ ունի՝ Հայաստանը փորձում է միջազգային հանրությանը ցույց տալ, որ այս կամ այն հարցում կարող է ունենալ Ռուսաստանից տարբեր կարծիք:
«Կարծես թե իշխող կուսակցության ներկայացուցիչները պետք է «դեմ» քվեարկեին Ռուսաստանի նկատմամբ պատժամիջոցների կիրառմանը, բայց «ձեռնպահ» մնացին՝ ելնելով վերջին 3-4 ամսվա միտումներից: Արևմուտքում և աշխարհում, ընդհանրապես, շատ է ուժեղանում այն կարծիքը, որ Հայաստանը ինքնուրույն քաղաքականություն չի վարում: Ես կարծում եմ, որ եկավ ժամանակը ցույց տալու, որ դա այդպես չէ»,- «Առաջին լրատվական»-ի հետ զրույցում ասաց Ստեփան Գրիգորյանը՝ հիշեցնելով, որ ՄԱԿ-ում Ղրիմի հարցը քննարկելիս Հայաստանը հօգուտ Ռուսաստանի քվեարկեց:
«Ավելին՝ միջազգային կառույցներում Ուկրաինայի հարցում Հայաստանը մշտապես մեկուսանալով Ռուսաստանի հետ է եղել: Սա լուրջ մեկուսացում էր: Հայաստանը ուղղակի ասում է, որ անպայման չէ բոլոր հարցերում հօգուտ Ռուսաստանի քվեարկել: Սա, այո, մի քիչ ցուցադրական քայլ էր: Դրանով ուզում են մեղմել այն բացասական ֆոնը, որ կա աշխարհում Հայաստանի նկատմամբ»,- ասաց Ստեփան Գրիգորյանը:
Հիշեցնենք՝ հունվարի 28-ին ԵԽԽՎ-ն Ռուսաստանին մինչև 2015 թվականի ապրիլը ձայնի իրավունքից զրկելու վերաբերյալ բանաձև է ընդունել՝ 160 կողմ, 42 դեմ, 11 ձեռնպահ ձայների հարաբերակցությամբ: Ուշագրավ է, որ ԵԽԽՎ-ում Հայաստանի պատվիրակության անդամներ ՀՀԿ-ականներ Նաիրա Կարապետյանը և Հերմինե Նաղդալյանը, ՕԵԿ-ական Մհեր Շահգելդյանը ձեռնպահ են քվեարկել: Ստրասբուրգում գտնվող պատվիրակության մյուս ՀՀԿ-ական անդամ Արփինե Հովհաննիսյանը քվեարկությանը չի մասնակցել վատառողջ լինելու պատճառով։ Նույն պատճառաբանությամբ Ստրասբուրգ չեն մեկնել ԲՀԿ-ական Նաիրա Զոհրաբյանն ու Վահե Հովհաննիսյանը, ինչպես նաև ՀԱԿ ներկայացուցիչ Լևոն Զուրաբյանը:
Նշենք, որ Ադրբեջանի պատվիրակությունը հօգուտ Ռուսաստանի է քվեարկել:
