Թբիլիսիի կենտրոնում այսօր հավաքված մի քանի հարյուր մարդ Վրաստանի իշխանություններից պահանջել են կատարել իրենց խոստումները, որոնք վերաբերում են արդարադատության վերականգնմանն ու արժանի պատժին երկրի նախկին ղեկավարության այն ներկայացուցիչների հանդեպ, ովքեր մասնակից են եղել բազմաթիվ հանցագործությունների:
Մետրոյի «Ռուսթավելի» կայարանի մոտ տեղի ունեցած ակցիան կազմակերպել էր «Վրաստանի հայրենասերների դաշինք» հասարակական կազմակերպությունը:
Ինչպես լրագրողներին հայտնել է կազմակերպության առաջնորդ Իրմա Ինաշվիլին՝ «ներկայիս իշխանությունները ոչինչ չեն անում՝ «Միացյալ ազգային շարժում» կուսակցության հանցագործներին պատժելու համար»:
Նրա կարծիքով՝ Վրաստանի նախկին նախագահ Միխեիլ Սաակաշվիլին ձերբակալվելու փոխարեն՝ «ազատ շրջում է ամբողջ աշխարհով»:
«Մենք դրա հետ չենք համակերպվի: Մենք պահանջում ենք զրոյական տոլերանտություն «Ազգային շարժման» հանդեպ»,- հավելել է նա:
