Գնունու շինարարական շուկայում առևտրականները «Առաջին լրատվական»-ի հետ զրույցում նշեցին, որ չեն պատրաստվում դադարեցնել Շրջանառության հարկի կիրառման դեմ պայքարը. «Եթե վարչապետը երկուշաբթի օրը որևէ բան չփոխեց, մենք կպարտադրենք, որ փոխի, հակառակ դեպքում փոքր բիզնեսի վրա ուղղակի խաչ կքաշվի»,- նշեցին առևտրականները՝ բարկացած հորդորելով Հովիկ Աբրահամյանին և ֆինանսների նախարարին գալ շուկա և տեսնել, թե շինարարական ապրանքները ինչպես են փաստաթղթավորելու:
Նրանց խոսքով ՝ շինարարական ապրանքների մեծ մասը ձեռք են բերում տներից. «Տան տերը մեզ որտեղից իր հին ապրանքի համար թուղթ տա, որ մենք էլ ցույց տանք, կամ միլիոն հատ մանր բոլտը ոնց փաստաթղթավորենք, ամոթ է…»,- մանրամասնեցին առևտրով զբաղվողները:
Ըստ նրանց ՝ Շրջանառության հարկի կիրառումը ժամանակավորապես կասեցվել էր մարդկանց «հարիֆացնելու» համար. «Մտածում էին, որ ժամանակ կշահեն ու կնահանջենք, բայց նահանջ չի լինելու, կառավարությունը ցանկանա, թե չէ, կասեցվելու է, տեսան, որ մարդիկ իրենցից շատ բան են հասկանում…»:
Առևտրով զբաղվողները վարչապետին հիշեցրին, որ պաշտոնավարման սկզբում խոստացել էր, որ լավ է լինելու, այնինչ հակառակն է. «Որ ասեց՝ լավ է լինելու, չհասկացանք, որ լավ միայն իրենց համար է լինելու»,- եզրափակեցին նրանք:
Նշենք նաև, որ շուկայում 20-ից ավելի տաղավարներ արդեն չեն գործում, իսկ վիճահարույց օրենքի կիրառման դեպքում առևտրականների խոսքով՝ բոլորը իրենց տաղավարները կփակեն: