Ինչպես տեղեկացրել էինք, «100-ամյակն առանց ռեժիմի» շարժումը Արցախում այսօր ավտոերթ է իրականացնելու: Այս իրազեկում-ավտոերթը պետք է լիներ դեռ դեկտեմբերի 19-ին: Սակայն Արցախի ղեկավարությունը, հանդիպելով Ժիրայր Սեֆիլյանին, ասել էր, որ կիսապատերազմական վիճակում գտնվող և չճանաչված կարգավիճակ ունեցող Արցախի համար էական նշանակություն ունի ՀՀ-ի հետ ամուր կապը, որը, ըստ նրանց, առաջին հերթին հիմնված է պաշտոնական Երևանի նկատմամբ արցախցիների հավատի ու վստահության վրա, մինչդեռ ավտոերթերը կարող են սասանել այդ հավատն ու վստահությունը:
Այնուամենայնիվ, որոշվեց երթն իրականացնել, սակայն Հիմնադիր խորհրդարանի 43 ավտոմեքենաների մուտքը Շուշի այս պահին խոչընդոտում են Ղարաբաղի ոստիկանները, ովքեր քաղաքացիական համազգեստով են: Այդ մասին «Առաջին լրատվական»-ին տեղեկացրեց Հիմնադիր խորհրդարանի անդամ Սյուզան Սիմոնյանը:
Ազատամարտիկ Քերոբ Ղազարյանը թեև մի քանի օր առաջ մեզ ասել էր, որ մասնակցելու է ավտոերթին, այսօր մեզ հետ զրույցում տարօրինակ պատասխան տվեց: «Նրանք Ղարաբաղ չեն կարող հասնել, ոչ, Ղարաբաղն ինչ կապ ունի Հայաստանի հետ, թող Հայաստանում անեն»,- ասաց նա՝ հավելելով, որ կարող են թող գան, ով է բան ասում:
Սյուզան Սիմոնյանը հենց նոր տեղեկացրեց, որ երբ մոտեցել են սահմանին, բարձունքին զենքերով դիմակավորներ հարձակում են գործել, նրանց միացել են հարյուրավոր ոստիկաններ:
«Ժիրայր Սեֆիլյանը և Հիմնադիր խորհրդարանի մյուս անդամները, երբ իջան խոսելու, հանկարծ հազարավոր ոստիկաններ հայտնվեցին, նաև զինվորականներ, կոտորեցին կին ու երեխա, ծեծի ենթարկեցին լրագրողի, մեր մեքենաները, որտեղ երեխաներ կան, քարերով ջարդուփշուր արեցին, փորձում էին մեզ դուրս հանել, խլել մեր ձեռքի հեռախոսները, մեքենաների բանալիները, հայհոյում էին և ասում «սիկտիր» եղեք այստեղից: Այսպես նույնիսկ մարտի մեկին չի եղել, մարտի մեկի դաժան կրկնություն էր, հիմա Նոյյան Տապանի Մոսկվայի թղթակցին՝ Անուշավան Շահնազարյանին, տեղափոխում են Գորիսի հիվանդանոց: Գլխի շրջանում վնասվածքներ, ամբողջն արյան մեջ»,-ասաց նա:
