ԱԺ ՀՀԿ-ական նախկին պատգամավոր Հակոբ Հակոբյանը բնավ չի ընկճվել, որ Հայոց ցեղասպանության մասին իր հեղինակած ֆիլմը տեղ չի գտնի Հայոց ցեղասպանության հարյուրամյա տարելիցի պաշտոնական միջոցառումների շրջանակում:
Նշենք, որ այդ մասին այսօր լրագրողների հետ հանդիպման ժամանակ ասել է նախագահի աշխատակազմի ղեկավար Վիգեն Սարգսյանը՝ անդրադառնալով ֆիլմի գեղարվեստական արժեքին:
«Մենք նպատակ չէինք էլ դրել, որ ֆիլմը պարտադիր պետք է օգտագործվեր պաշտոնական միջոցառումների ցանկում: Սա մասնավոր նախաձեռնություն է, և ես նպատակ էլ չեմ ունեցել, որ այն ընդգրկվի պաշտոնական միջոցառումների ցանկում: Ես պարզապես, որպես քաղաքացի, ցանկություն ունեցա մեր ժողովրդի պատմությունը ներկայացնել ֆիլմում: Իսկ այդ պատմությունը պատմել են մեզ շրջապատող մարդիկ»,- «Առաջին լրատվական»-ի հետ զրույցում ասաց Հակոբ Հակոբյանը:
Նա զարմանում է, որ ասում են՝ Ցեղասպանության ֆիլմի սցենար: Նրա խոսքով՝ յուրաքանչյուր հայ մարդ Ցեղասպանության մասին բազմաթիվ պատմություններ գիտի և հանգիստ կարող է դրանք էկրանավորել: «Ես չեմ նստել այդ պատմությունները հորինել: Դրանք իրական պատմություններ են, որոնք մենք ներկայացրել ենք հանրությանը»,- հավելեց Հակոբյանը:
Հարցին՝ այդ դեպքում, իր կարծիքով, ինչո՞ւ չընդունվեց ֆիլմը, Հակոբյանը պատասխանեց՝ պատճառն այն է, որ մարդիկ դեռ ֆիլմը չդիտած՝ կարծիք են հայտնում դրա մասին:
«Ֆիլմը դիտել են մի քանի մարդ՝ շատ նեղ խմբով, մեր մասնագետների հետ: Բայց հիմա բոլորը կարծիք են հայտնում, թե՝ այ, շատ վատ է: Բայց ես համոզված եմ, որ միայն թրեյլերը նայելով հնարավոր չէ ֆիլմի մասին կարծիք հայտնել: Ինչպե՞ս կարելի է ասել՝ ես ֆիլմը չեմ նայել, բայց վատն է»,- զարմանում է ֆիլմի սցենարի հեղինակը:
Նրա խոսքով՝ ֆիլմը դեռ ամբողջական պատրաստ էլ չի, աշխատանքային տարբերակն է, և առաջին՝ փակ ցուցադրությունից հետո մոտ 50 փոփոխություն, ուղղում է կատարվել ֆիլմի վրա:
«Հիմա մարդիկ, որ քննադատում են ֆիլմը, սխալ մարդիկ են»,- ասաց Հակոբյանը՝ հաջորդիվ պատմելով իր տարօրինակ նախաձեռնության մասին: «Տեսեք մենք ինչ ենք արել՝ կազմել ենք մարդկանց 375 հոգանոց ցուցակ, որոնք, մենք գիտենք, ֆիլմը նայելուց հետո անպայման բացասաբար են արտահայտվելու: Հետո մենք այդ ցուցակը տարել ենք նոտարական գրասենյակ, վավերացրել ենք և պահել մեզ մոտ: Հիմա ֆիլմի պրեմիերայից հետո ցանկացած մեկը, ով ուզենա ինչ-որ բան ասել, մենք հանելու ենք ցուցակը և ասենք՝ մենք գիտեինք, որ ինքը բացասաբար է արտահայտվելու: Մենք նոտարական կարգով վավերացրել ենք այդ ցուցակը, պահել, որ հանկարծ այդ մարդիկ չասեն, թե ֆիլմից հետո ենք մենք իրենց անունը ավելացրել»,- պատմեց Հակոբյանը՝ հրաժարվելով թվարկել ցուցակում ընդգրկված անձանց անունները:
Հակոբյանը միայն մեկ բանում է վստահ՝ իր ֆիլմը քննադատում են այն դերասաններն ու ռեժիսորները, որոնց իրենք չեն ընդգրկել ֆիլմում: «Բնական է, որ նրանք պետք է դժգոհ լինեին: Մենք իրենց բանի տեղ չենք դրել, ֆիլմ չենք հրավիրել, իրենք էլ պետք է դժգոհ մնային»,- եզրափակեց Հակոբ Հակոբյանը՝ ևս մեկ անգամ ընդգծելով, որ ինքը բնավ չի ընկճվել ֆիլմի շուրջ առկա բացասական արձագանքներից:
