Քիչ առաջ Ազգային ժողովում՝ «Ժառանգություն» խմբակցությունում, սկսվեց ոչիշխանական եռյակի՝ «Բարգավաճ Հայաստան», ՀԱԿ և «Ժառանգություն» խմբակցությունների նիստը։ Նշենք, որ սա այս տարվա առաջին նիստն է։ ՀԱԿ խմբակցության քարտուղար Արամ Մանուկյանը լրագրողներին ասաց, որ քննարկելու են եռյակի այս տարվա անելիքներն ու փետրվարի 2-ին սկսվող քառօրյա նիստերին իրենց համատեղ գործունեությունը։
Նիստին «Ժառանգությունից» մասնակցում են խմբակցության ղեկավար Ռուբիկ Հակոբյանն ու կուսակցության փոխնախագահ Արմեն Մարտիրոսյանը։ ԲՀԿ-ից նիստին մասնակցում են խմբակցության քարտուղար Նաիրա Զոհրաբյանը, Ստեփան Մարգարյանը և Վարդան Օսկանյանը։ ՀԱԿ-ից մասնակցում է խմբակցության ղեկավար Լևոն Զուրաբյանը։ Ա.Մանուկյանը նիստը սկսվելուն պես դուրս եկավ՝ ասելով, որ այսօր Մարտի 1-ի զոհերից Տիգրան Խաչատրյանի ծննդյան օրն է, և պետք է գերեզմանատուն գնան։
